გარდაბანში მე-12 საჯარო სკოლის პედაგოგები გაიფიცნენ. 80-მდე პედაგოგი გარდაბნის მუნიციპალიტეტის გამგეობასთან შეიკრიბა და ისინი გარდაბანსა და მიმდებარე სოფლებში უფასო ავტობუსის გაუქმებას აპროტესტებდნენ.
პედაგოგების განცხადებით, გარდაბნის მუნიციპალიტეტის გამგეობამ მათ განუმარტა, რომ 12 დეკემბრიდან 2013 წლის დასაწყისამდე ავტობუსით მგზავრობა უფასო აღარ იქნებოდა და მათ მგზავრობის ღირებულების გადახდა თავადვე მოუწევდათ.
გაფიცული მასწავლებლების თქმით, ორი კვირის განმავლობაში ავტობუსს 640 ლარის საწვავი სჭირდება, რაც საკმაოდ მიზერული თანხაა და მისი გამოყოფა ბიუჯეტს არ უნდა გასჭირვებოდა.
პედაგოგებს გარდაბნის მუნიციპალიტეტის საკრებულოს თავმჯდომარე გიორგი ხურცილავა და გარდაბნის მაჟორიტარი დეპუტატი გიორგი ფეიქრიშვილი შეხვდნენ.
როგორც მათ განაცხადეს, გარკვეული გაუგებრობა მოხდა და ხვალიდან გარდაბანსა და მის მიმდებარე სოფლებში უფასო ტრანსპორტი აღდგება.