დღეს, 11 დეკემბერს, "ქართული ოცნების" პრეზენტაციიდან ერთი წელი სრულდება. საზოგადოებრივი მოძრაობა "ქართული ოცნების" პრეზენტაცია 2011 წლის 11 დეკემბერს თბილისის საკონცერტო დარბაზში გაიმართა.
"2003 წლის ვარდების რევოლუციამ მიუხედავად პირვანდელი წარმატებებისა ვერ გაამართლა საზოგადოების უდიდესი ნაწილის ნდობა", - აღნიშნა 2011 წლის 11 დეკემბერს "ქართული ოცნების" პრეზენტაციაზე ბიძინა ივანიშვილმა.
"სამოქალაქო საზოგადეობა უხეშადაა ჩამოშორებული სახელმწიფოს მართვას. მოშლილია ადგილობრივი თვითმმართველობა. არჩევითი ორგანოები მმართველ ელიტას ემსახურებიან. აბუჩადაა აგდებული ქვეყნის კონსტიტუცია, მისი გადაკეთებისა და ერთ ადამიანზე მორგების დამკვიდრებული პრაქტიკა ყოველგვარ სამართლებრივ და მორალურ ნორმებს სცდება", - განაცხადა მაშინ ივანიშვილმა.
მისი თქმით, ნორმად იქცა საბიუჯეტო სახსრების ხარჯვის გაუმჭვირვალეობა და არამიზნობრივი გამოყენება.
"გამეფებულია ელიტარული კორუფცია. ადამიანის უფლებები ირღვევა ყველა სფეროში. ციხეებში პოლიტიკური, უდანაშაულო და მცირე დანაშაულისთვის ათასობით პატიმარია გამომწყვდეული, დამამცირებელი და არაადამიანური მოპყრობის პირობებში. ზეწოლა ხორციელდება მათ ოჯახებზე, განსაკუთრებით მაშინ, როდესაც ხელისუფლება არჩევნებისთვის ემზადება", - აღნიშნა ივანიშვილმა.
