ქსნის მინის ქარხნის 250-მდე თანამშრომელი დირექტორის, გიორგი მგელაძის გადადგომას მოითხოვს.
გაფიცული თანამშრომლები სამუშაო პირობების გაუმჯობესებასა და ხელფასების მომატებასაც მოითხოვენ. მათი თქმით, ხელფასები მიზერულია და სამუშაო პირობები - მძიმე.
მოთხოვნების დაკმაყოფილებამდე საწარმოს თანამშრომლები გაფიცვის შეწყვეტას არ აპირებენ.
მგელაძე აქციის მონაწილეთა ბრალდებებს აბსურდულს უწოდებს. მისი თქმით, ბოლო წლების განმავლობაში დაახლოებით ექვსჯერ მოხდა ხელფასების მატება. როგორც მან აღნიშნა, საწარმოს თანამშრომლები ასევე სარგებლობენ დაზღვევითა და უფასო კვებით.