,,ჩვენი ამოცანაა საქართველოში ხელი შევუწყოთ ლიბერალური დემოკრატიის ჩამოყალიბებას", - განაცხადა ჟურნალისტებთან თავდაცვის მინისტრმა და ,,თავისუფალი დემოკრატების" ყოფილმა თავმჯდომარემ ირაკლი ალასანიამ პარტიული ყრილობის დაწყებამდე.
,,დღევანდელი დღე ჩვენი პარტიისთვის მნიშვნელოვანი დღეა, რადგან რიგით მეორე ყრილობა ტარდება. იმის გამო, რომ დავტოვე პარტიული თანამდებობა, ყრილობის დელეგატები აირჩევენ პარტიის ახალ თავმჯდომარეს, პარტიულ გამგეობებს. ეს არის პარტიული ცხოვრების გაგრძელება უკვე პოლიტიკურ კონკურენტულ გარემოში და აქედან გამომდინარე მიხარია, რომ ჩვენი პარტია ,,თავისუფალი დემოკრატები" ვითარდება. ჩვენი ამოცანაა საქართველოში ხელი შევუწყოთ ლიბერალური დემოკრატიის ჩამოყალიბებას და დარწმუნებული ვარ, ,,თავისუფალი დემოკრატები" ვიქნებით ის პარტია, რომელიც სხვებთან ერთად, დემოკრატიული ქვეყნის შექმნაში მიიღებს მონაწილეობას", - განაცხადა ალასანიამ.
შეგახსენებთ, რომ "ექსპო ჯორჯიას" მესამე პავილიონში, "ჩვენი საქართველო-თავისუფალი დემოკრატების" ყრილობა მიმდინარეობს,
სადაც პარტიის ახალ თავმჯდომარეს აირჩევენ. გავრცელებული ინფორმაციით, პარტიის თავმჯდომარეობის კანდიდატი, ეროვნულ დემოკრატიული პარტიის მთავარი კომიტეტის ყოფილი წევრი და საპარტიარქოს ფონდის ყოფილი თავჯდომარე ირაკლი ქადაგიშვილია. ყრილობაზე იგეგმება თვითმმართველობის არჩევნებთან დაკავშირებით პარტიის სამომავლო გეგმების განხილვა.
ყრილობაზე დასასწრებად 700 დელეგატია მოწვეული. მათ შორის არიან საქართველოს პრემიერ-მინისატრი ბიძინა ივანიშვილი, თავდაცვის მინისტრი ირაკლი ალასანია, იუსტიციის მინისტრი თეა წულუკიანი. ყრილობაზე ასევე ელოდებიან, კოალიცია "ქართულ ოცნებაში" შემავალი პარტიის წარმომადგენლებსაც."თავისუფალი დემოკრატების" თავმჯდომარე ირაკლი ალასანია იყო. მან თავმჯდომარის პოსტი თავდაცვის მინისტრად დამტკიცების შემდეგ დატოვა. ამასთან, ახალი თავმჯდომარის არჩევის შემდეგ პარტია ახალი სახელით -"თავისუფალი დემოკრატებით" გააგრძელებს საქმიანობას.