როგორც კახეთის საინფორმაციო ცენტრს რექტორის ყოფილმა მრჩეველმა სოსო მიქელაძემ განუცხადა, მისი გათავისუფლების მიზეზი რექტორთან დაპირისპირებაა.
„წინასაარჩევნო პერიოდიდან 4 თვის განმავლობაში 1 თვიან ხელშეკრულებებს გვიდებდნენ, რომ თანამშრომლების სანდოობა შეემოწმებინათ. ახლა ხელშეკრულება დამთავრდა და გამომიშვეს. სამსახურიდან იმიტომ გამიშვეს, რომ სიმართლეს ვამბობდი, მაგრამ ბრძოლას მაინც გავაგრძელებ," - განაცხადა სოსო მიქელაძემ.
მისივე თქმით, რექტორმა ავთანდილ ფანგანი უნივერსიტეტში არსებული დაპირიპირების გამო გაათავისუფლა. „ფანგანის გაშვების მიზეზი გასაგებია. იმიტომ გაუშვა, რომ სკანდალი აგორდა, თუმცა მისი გაშვება მოჩვენებითია, გარკვეულ პროექტებში მაინც რჩება და მერე ალბათ დააბრუნებენ სამსახურში," - აღნიშნა მიქელაძემ.
სოსო მიქელაძე და უნივერსიტეტის თანამშრომლების ნაწილი რამდენიმე კვირის წინ რექტორს და ავთანდილ ფანგანს დაუპირისპირდნენ. ისინი ფანგანს თანხების არამიზნობრივ ხარჯვაში, თანამშრომლებზე ზეწოლასა და მათზე პერსონალური ინფორმაციის უკანონოდ მოპოვებაში, რექტორს კი ფანგანის მფარველობაში ადანაშაულებდნენ.
თინათინ ჯავახიშვილის განცხადებით, სოსო მიქელაძე მოვალეობის შეუსრულებლობის გამო გაათავისუფლა, ავთანდილ ფანგანი კი იმის დასამტკიცებლად, რომ არავის მფარველობს.
„ორივეს ხელშეკრულების ვადა გაუვიდა და ამიტომ გავუშვი. სოსო მიქელაძე დაპირისპირების გამო არ გამიშვია, არ ასრულებდა მოვალეობას და იმიტომ გავუშვი. ფანგანს რაც შეეხება, ახლა დარწმუნდებიან, რომ არავის ვმფარველობ. ბატონი ავთო საზღვარგარეთ არის და რომ ჩამოვა, გადავწყვეტ პროექტებიდან ახლავე გავუშვებ თუ ჯერ გააგრძელებს პროექტების ფარგლებში მუშაობას", - განუცხადა თინათინ ჯავახიშვილმა კახეთი საინფორმაციო ცენტრს.
მისი თქმით, თანამშრომლებთან ერთთვიანი ხელშეკრულებების დადება უნივერსიტეტში ფინანსური კრიზისით არის გამოწვეული: „სტიქიის გამო სტუდენტები გადასახადს ვეღარ იხდიან. დაპირების მიუხედავად, არც მთავრობას ჩაურიცხავს ჩვენთვის სტუდენტების სწავლის გადასახადი, ამიტომ ფინანსური პრობლემებია და 1 თვიანი ხელშეკრულებებიც ამიტომ ფორმდება", - განაცხადა რექტორმა.