რიო-დე-ჟანეიროში მეოცე საუკუნის ერთ-ერთი ყველაზე სახელგანთქმული არქიტექტორი, ოსკარ ნეიმარი გარდაიცვალა. ამის შესახებ ინფორმაციას „ეი-ბი-სი-ნიუსი" ავრცელებს. ის საავადმყოფოში დაიღუპა, სადაც უკანასკნელი ათი დღის განმავლობაში მკურნალობდა.
უკანასკნელი წლის განმავლობაში ნეიმარი ორჯერ იქნა ჰოსპიტალიზებული სამკურნალო დაწესებულებაში. არქიტექტორის პირადი ექიმის განცხადებით, მიუხედავად ჯანმრთელობის მდგომარეობის გაუარესებისა, ის ბოლო დღეებამდე მუშაობდა ახალ პროექტებზე, მასთან პალატაში მიდიოდნენ ინჟინრები და სხვა სპეციალისტები და კონსულტაციების იღებდნენ. „ყველაზე შთამბეჭდავი არის ის, რომ მისი სხეული უმძიმეს მდგომარეობაში იყო, ხოლო გონება ბოლო წუთამდე შეინარჩუნა. არასდროს საუბრობდა სიკვდილზე, საუბრობდა მხოლოდ სიცოცხლეზე", - ყვება ექიმი.
ნეიმერი ბრაზილიური თანამედროვე არქიტექტურის სკოლის დამფუძნებლად ითვლება. მისი შემოქმედებაა საფრანგეთის კომუნისტური პარტიის შტაბ-ბინა პარიზში, გაერთიანებული ერების ორგანიზაციის შენობა ნიუ-იორკში და თანამედროვე კულტურის მუზეუმი ნიტეროიში. არქიტექტორი მრავალი ჯილდოს მფლობელია, რომელთა შორისაც არის პრიტცევსკის პრემია - ყველაზე პრესტიჟული პრემია არქიტექტურის სფეროში. აღსანიშნავია, რომ ქალაქი ბრაზილია, სადაც ნეიმერის მიერ დაპროექტებული ბევრი შენობაა, ერთადერთი ქალაქია მსოფლიოში, რომელიც იუნესკოს მსოფლიო კულტურული მემკვიდრეობის სიაშია.
