დღის ბოლომდე საქართველო მთავრობა რუსული კომპანია „ინტერ რაოს" ხედვების შესახებ შეიტყობს, თუ როგორ მოხდება ქვეყანაში ელექტროენერგიის ტარიფის შემცირება. როგორც დღეს ენერგეტიკისა და ბუნებრივი რესურსების მინისტრმა კახი კალაძემ ტელეკომპანია „მაესტროს" ეთერით განაცხადა, დღეს, 12 საათზე სამუშაო ჯგუფი „ინტერ რაოს" ხელმძრვანელობას ხვდება, რათა დადგინდეს, თუ როგორი ხედვა აქვს კომპანიას საქართველოში ელექტროენერგიის ტარიფების შემცირებასთან დაკავშირებით.
„ეს არის არასახელმწიფო კომპანია და ჩვენ ბერკეტები არ გაგვაჩნია, რომ ჩავერიოთ და პირდაპირი მითითებები გავუკეთოთ რომ თქვენ ეს აუცილებლად უნდა გაკეთოთ"- აღნიშნა კალაძემ.
მინისტრი ამბობს, რომ სახელმწიფოს წილი „თელასში" მხოლოდ 25 %-ია, და მთავრობას კონკრეტული მითითებების მიცემის უფლება არ გააჩნია.
მინისტრი „თელასის" მიერ განუხორციელებელ პროექტებზეც ამახვილებს ყურადღებას და აცხადებს, რომ მიუხედავად იმისა, რომ მათ ჰესების მშენებლობისათვის 2016 წლამდე აქვს ვადა, თუმცა ასეთი დიდი ჰესის მშენებლობას მინიმუმ 5 წელი ესაჭიროება. მინისტრი აცხადებს, რომ ტარიფის დაკლება ძირითადად დისტრიბუციის ნაწილში მოხდება, რაც საბოლოო ტარიფზე აისახება. როგორც მინისტრი აცხადებს, დისტრიბუციას თბილისის მასშტაბით „თელასი", კახეთის მასშტაბით „კახეთის სადისტრიბუციო კომპანია", ხოლო დანარჩენი საქართველოს მასთაბით დისტრიბუციას „ენერგო პრო ჯორჯია" ახორციელებს. მინისტრი განმარტავს, რომ „კახეთის სადისტრიბუციო კომპანია" გაკოტრების რეჟიმშია და ამ ნაწილში სახელმწიფოს სუბსიდიის გაკეთება მოუწევს.
კახი კალაძე აცხადებს, რომ კვირის ბოლომდე ქვეყნის მასშტაბით ელექტროენერგიის ტარიფის დაკლების კონკრეტულ მონაცემებზე, ანუ თუ რამდენი თეთრით გაიაფდება ტარიფი, გახდება ცნობილი.
