მისივე განცხადებით, ბენზინის გაფლანგვასა და სიტყვიერ შეურაცხყოფაზე ხალხის დაკავება ხელისუფლებას კარგად არ შემოუბრუნდება.

"იმ ფონზე, როცა დასავლური მედიისა და პოლიტიკური ელიტის მხრიდან, ფაქტობრივად, ახალი ხელისუფლების მისამართით შტურმი მიმდინარეობს და შტურმის ერთ-ერთი მთავარი საბაბი ქვეყანაში მიმდინარე დაკავებებია ხელისუფლებამ ყველაფერი უნდა გაკეთოს, რათა დასავლურ მედიასა და პოლიტიკურ ელიტას რაიმე საბაბი არ მისცეს. მძიმე დამნაშავეს, როცა იჭერ იმის გამო, რომ ბენზინი გაფლანგა და ნასვამ მდგომარეობაში ვიღაცას სიტყვიერი შეურაცხყოფა მიაყენა, ამ ფაქტით ხელისუფლება პირდაპირ საჩუქარს უკეთებს იმ ძალებს, ვინც ამბობს, რომ საქართველოში ადამიანების პოლიტიკური დევნა მიმდინარეობს", - განაცხადა ,,ჯი-ეიჩ-ენთან" საუბარში ლაგაზიძემ, რომელიც ხელისუფლების ამ გადაწყვეტილებებს სპონტანურობით ხსნის.

მისი თქმით, ხელისუფლება რა მოტივებით იღებს ამ გადაწყვეტილებას, გაუგებარია. ამიტომ ამ ყველაფერზე ხელისუფლება კარგად უნდა დაფიქრდეს.

"ვფიქრობ, ეს მაინც სპონტანური გადაწყვეტილებებია და ადრე თუ გვიან ხელისუფლება ამ პროცესების გაანალიზებას დაიწყებს და რაც უფრო მალე მოხდება ეს, უკეთესია', -განაცხადა სააგენტო ,,ჯი-ეიჩ-ენთან" საუბარში ხათუნა ლაგაზიძემ.

შეგახსენებთ, რომ სამართალდამცავებმა ბოლო პერიოდის განმავლობაში მოქმედი და ყოფილი ხელისუფლების რამდენიმე მაღალი თანამდებობის პირი დააკავეს. მათ შორის შსს-ს გენინსპექციის ყოფილი უფროსი თენგიზ გუნავა. დაკავების მიზეზი ამჯერად 3000 ლიტრი ბენზინის მითვისება გახდა. გუნავას ბრალი სისხლის სამართლის კოდექსის 333-ე მუხლით და 182-ე მუხლით წაუყენეს. გამოძიება 3000 ლიტრ ბენზინზე ხარჯთაღრიცხვას ითხოვს.შსს-ს გენერალური ინსპექციის ყოფილი უფროსი პირველად 15 ნოემბერს საკუთარი სახლის სადარბაზოსთან დააკავეს. მას ბრალად იარაღის უკანონო შეძენა, შენახვა, ტარება და ასევე ნარკოტიული ნივთიერებების ზემოქმედების ქვეშ ყოფნა ედება. თენგიზ გუნავა დანაშაულს უარყოფს. საქალაქო სასამართლომ მას აღმკვეთი ღონისძიების სახით 10 000 ლარიანი გირაო შეუფარდა. გუნავა მიიჩნევს, რომ სამართალდამცავებმა ნარკოტიკული საშუალებები და იარაღი ჩაუდეს რის გამოც მან სასამართლოში სარჩელი შეიტანა.