,,ნაციონალური მოძრაობა" თენგიზ გუნავას ხელახალ დაკავებას პოლიტიკურ აქტად აფასებს. როგორც ჟურნალისტებთან ,,ნაციონალური მოძრაობის" ერთ-ერთმა ლიდერმა პავლე კუბლაშვილმა განაცხადა, ხელისუფლების მიზანია თენგიზ გუნავას ციხეში ყოფნა.
"სამი კვირის წინ დაფიქსირდა ბატონ ღარიბაშვილისა და ქალბატონ წულუკიანის უწყებების მიერ იარაღისა და ნარკოტიკების ჩადების პირველი ფაქტი. საუბარია თენგიზ გუნავას საქმეზე. ამასთან დაკავშირებით ვაცნობეთ საერთაშორისო ორგანიზაციებს, უფლებადამცველებს და როგორც ჩანს, მათი ზეწოლის შედეგად ხელისუფლება იძულებული გახდა, რომ აღეძრა საქმე კონკრეტული საქმესთან დაკავშირებით და როგორც ჩანს, ხელისუფლებამ მიიღო გადაწყვეტილება სამაგალითოდ დაესაჯა თენგიზ გუნავა იმ მიზნით, რომ სხვა დროს აღარავის აღარ გაებედა ხმის ამოღება", - განაცხადა ჟურნალისტებთან პავლე კუბლაშვილმა და აღნიშნა, რომ გუნავას საქმესთან დაკავშირებით საერთაშორისო ორგანიზაციებს მიმართავენ.
Mმისივე განცხადებით, ივანიშვილის გუნდის მიზანი თენგიზ გუნავას დაკავებაა.
,,როგორც ჩანს ივანიშვილის რეჟიმი განწყობილია, რომ ეს კონკრეტული ადამიანი თენგიზ გუნავა იყოს დაკავებული და იყოს სასჯელაღსრულების დაწესებულებაში, მაგრამ ეს ყველაფერი ასე არ მოხდება და დარწმუნებული ვარ, საერთაშორისო, უფლებადამცველი ორგანიზაციები და საზოგადოება ამ ფაქტს ჯეროვნად შეაფასებს", -განაცხადა კუბლაშვილმა.
შეგახსენებთ, რომ შსს-ს გენინსპექციის ყოფილი უფროსი თენგიზ გუნავა 29 ნოემბერს დააკავეს. დაკავების მიზეზი ამჯერად 3000 ლიტრი ბენზინის მითვისება გახდა. გუნავას ბრალი სისხლის სამართლის კოდექსის 333-ე მუხლით და 182-ე მუხლით წაუყენეს. გამოძიება 3000 ლიტრ ბენზინზე ხარჯთაღრიცხვას ითხოვს. მანამდე კი შსს-ს გენერალური ინსპექციის ყოფილი უფროსი პირველად 15 ნოემბერს საკუთარი სახლის სადარბაზოსთან დააკავეს. მას ბრალად იარაღის უკანონო შეძენა, შენახვა, ტარება და ასევე ნარკოტიული ნივთიერებების ზემოქმედების ქვეშ ყოფნა ედება. თენგიზ გუნავა დანაშაულს უარყოფს. საქალაქო სასამართლომ მას აღმკვეთი ღონისძიების სახით 10 000-ლარიანი გირაო შეუფარდა.
