სიღნაღის მუნიციპალიტეტის გამგებელი ვაჟა ჯანყარაშვილი თანამდებობიდან გადადგა. როგორც მან კახეთის საინფორმაციო ცენტრს განუცხადა, თანამდებობა პირადი განცხადების საფუძველზე დატოვა.
კახეთის საინფორმაციო ცენტრის ინფორმაციით, გამგებელს თანამდებობიდან გადადგომა „ქართული ოცნების" წარმომადგენლებმა მოსთხოვეს. „ამ საკითხზე კომენტარს არ გავაკეთებ", - განაცხადა ვაჟა ჯანყარაშვილმა
სიღნაღის მუნიციპალიტეტის გამგებლად ვაჟა ჯანყარაშვილი 2012 წლის 31 ოქტომბერს დაინიშნა. ჯანყარაშვილი „ერთიანი ნაციონალური მოძრაობის" წევრია და მანამდე, საზოგადოებრივი ჯანდაცვის რაიონულ ცენტრს ხელმძღვანელობდა.
26 ნოემბერს თანამდებობიდან გადადგა სიღნაღის მუნიციპალიტეტის საკრებულოს თავმჯდომარე ზაზა ზედელაშვილი, რომელიც არჩილ მჭედლიშვილმა ჩაანაცვლა.
შეგახსენებთ, არჩევნების შემდეგ თანამდებობებიდან გადადგნენ თელავის, ახმეტის, გურჯაანის, დედოფლისწყაროს, ლაგოდეხის გამგებლებიც.
