საკანონმდებლო ორგანოში საქართველო-ნატოს ურთიერთობების შესახებ დისკუსია გაიმართა. ერთობლივ ღონისძიებაზე, რომელიც დახურულ კარს მიღმა გაიმართა, საგარეო ურთიერთობათა, ევროპასთან ინტეგრაციის და თავდაცვისა და უშიშროების კომიტეტების წევრებმა თბილისში ნატოს სამეკავშირეო ოფისის წარმომადგენლებთან ერთად ნატო-საქართველოს ურთიერთობების და პარტნიორობის პოლიტიკის საკითხებზე იმსჯელეს.
საგარეო ურთიერთობათა კომიტეტის თავმჯდომარემ, თედო ჯაფარიძემ ღონისძიების დაწყებამდე ჟურნალისტებისთვის კომენტარი გააკეთა და აღნიშნული შეხვედრის მნიშვნელობაზე ისაუბრა.
"საქართველოს პარლამენტში პირველად იმართება საკომიტეტო მოსმენა-ბრიფინგი ნატოსა და საქართველოს ურთიერთობების და მისი პერსპექტივების საკითხებზე. ამ შეხვედრას ესწრება საქართველოს მეგობარი, ნატოს სამეკავშირეო ოფისის ხელმძღვანელი უილიამ რეჰიუ, რომელთანაც ერთად გულახდილად ვისაუბრებთ თუ რაში მდგომარეობს საქართველო-ნატოს ურთიერთობები, სად და რომელ ეტაპზე ვართ და რამდენად რეალისტურია ჩვენი მიდგომები. ეს არის პირველი ამგვარი შეხვედრა, რომელიც მომავალშიც გაგრძელდება და ჩვენ ასევე განვიხილავთ საქართველო-ევროკავშირის, საქართველო-რეგიონების და სხვა ურთიერთობებს", - განაცხადა ჯაფარიძემ.
