ნაციონალური მოძრაობა ზესტაფონის გამგებლის, საქართველოს ჭიდაობის ფედერაციის პრეზიდენტ კახა გეწაძის დაკავებას ეხმიანება. გიორგი გაბაშვილი ამ ფაქტს პოლიტიკური დევნის გამოვლინებად მიიჩნევს.
"საქართველოს მთავრობამ დაგეგმა შეტევა ადგილობრივ თვითმმართველობებზე. ყველა თვითმმართველობაში, რომელსაც არ აკონტროლებს "ქართული ოცნება", შევიდა ფინანსური შემოწმება. გამგებლებსა და საკრებულოს თავმჯდომარეებს პირდაპირ უყენებენ ულტიმატუმს - ან გადადექი ან დაგიჭერთ. ძალიან ბევრგან ეს ხორციელდება ფინანსური პოლიციის საშუალებით, ბევრგან ამოქმედებულია პოლიცია და პროკურატურა. დღეს, როგორც ჩანს, უკვე დაიწყო მოქმედება და პირველი გამგებელია დაჭერილი - კახა გეწაძე, ზესტაფონის გამგებელი, რომელსაც ასევე მოსთხოვეს გადადგომა, მიუხედავად იმისა, რომ ის ერთი თვის წინ იყო არჩეული საკრებულოს სხდომაზე. შეგახსენებთ, რომ ჯერ კიდევ საკრებულოს სხდომაზე იყო მცდელობა ქართული ოცნების ჯგუფების მიერ, რომ ჩაეშალათ მისი არჩევა, მაგრამ მას შემდეგ, რაც ის კანონიერად იქნა არჩეული და მას შემდეგ, რაც საკრებულომ თავისი სიტყვა თქვა, ეს ზეწოლა არ შეწყდა და დღეს უკვე გვაქვს პირველი შედეგი - გეწაძე არის დაკავებული. იგი დაიჭირეს ყურით მოთრეული ბრალდებით - რამდენიმე წლის წინ რესტორანში შელაპარაკების გამო. ეს არის პირველი ნიშანი იმისა, რომ დაწყებულია მასირებული შეტევა ყველა იმ თვითმმართველობაზე, რომელსაც ვერ აკონტროლებს "ქართული ოცნება", - განაცხადა მან.
გაბაშვილის განცხადებით, გეწაძის დაჭერას ჰქონდა კიდევ ერთი მოტივაცია: ის არის ჭიდაობის ფედერაციის პრეზიდენტი და სპორტის სამინისტროს მხრიდანაც ჰქონდა ზეწოლა და შემოთვლა, რომ დაეტოვებინა ეს პოსტი. სპორტის სამინისტრო ფიქრობს, რომ თავისთვის მისაღები კანდიდატები უნდა გაიყვანოს ძირითადი სპორტული ფედერაციების ხელმძღვანელებად.
"ჩვენ, რა თქმა უნდა, ვაპროტესტებთ ამ დაკავებას. გვესმის, რომ დაწყებულია პოლიტიკური რეპრესიები, დევნის კამპანია თვითმმართველობების წინააღმდეგ. ეს კამპანია არ დარჩება უყურადღებოდ არც საქართველოში, უკვე ყველას ესმის და ეს ძალიან კარგად ესმის საერთაშორისო საზოგადოებასაც. გეწაძის დაკავების შესახებ დეტალურად მოვუყვებით ყველა საერთაშორისო ორგანიზაციას, დიპლომატიურ კორპუსს", - განაცხადა მან.
შეგახსენებთ, რომ ზესტაფონის გამგებელი და საქართველოს ჭიდაობის ფედერაციის პრეზიდენტი კახა გეწაძე დაკავებულია. გეწაძე ქუთაისის პროკურატურაში დაკითხვაზე იმყოფება. გეწაძე წინა მოწვევის პარლამენტში ზესტაფონის მაჟორიტარი დეპუტატი იყო. 2 ნოემბერს ზესტაფონის საკრებულომ გეწაძე ხმაურიან სხდომაზე რაიონის გამგებლად აირჩია.
გავრცელებული ინფორმაციით, გეწაძე ერთი წლის წინ მომხდარი ჩხუბის ფაქტზე დააკავეს. მას ბრალი სხვადასხვა მუხლით წაეყენება. ერთ-ერთი მუხლი, რომლითაც გეწაძეს ბრალს ოფიციალურად წაუყენებენ, არის საქართველოს სს კოდექსის 118 -ე მუხლის პირველი ნაწილი - ჯანმრთელობის განზრახ მსუბუქი დაზიანება. მეორე მუხლი, რომლითაც მას ბრალი წაეყენება, არის სს კოდექსის 239-ე მუხლის მესამე ნაწილი - ხულიგნობა, ჩადენილი ცეცხლსასროლი იარაღით. ეს კონკრეტული მუხლი 4-იდან 7 წლამდე თავისუფლების აღკვეთას ითვალისწინებს. პროკურატურის წარმომადგენლები აცხადებენ, რომ გეწაძის ბრალდებას დაემატა კიდევ ერთი მუხლი - ეს არის 184 -ე მუხლის პირველი ნაწილი.
პროკურატურაში დაბარებული კახა გეწაძე პირველ ეტაპზე მოწმის სახით იკითხებოდა, მოგვიანებით კი დააკავეს.
