ავტოსაგზაო შემთხვევა მოხდა საგარეჯოში. სამგზავრო მიკროავტობუსი „ჯიპის" მარკის ავტომანქანას შეეჯახა. შეჯახება იმდენად ძლიერი იყო, რომ 2 მგზავრი ადგილზე დაიღუპა, 6 კი მძიმედ დაშავდა.
„საავადმყოფოში ავარიის შედეგად დაშავებული 6 პაციენტი შემოიყვანეს. ერთ-ერთი მათგანის მდგომარეობა უკიდურესად მძიმეა, მას სასწრაფო ოპერაცია უტარდება. დაშავებულ მამაკაცს დაზიანებული აქვს ელენთა, ღვიძლი, მსხვილი ნაწლავი და დამტვრეული აქვს ნეკნები. მძიმეა ახალგზარდა ქალის ჯანმრთელობის მდგომარეობაც, მას ამჟამად გამოკვლევა უტარდება და შესაძლოა, ოპერაცია მასაც დასჭირდეს. დანარჩენ პაციენტებს სხვადასხვა მრავლობითი ტრავმები აქვთ მიღებული. მათ აღენიშნებათ კიდურების მოტეხილობები, სხეულის დაჟეჟილობები, ქალა-ტვინის ტრავმები და სახის არეში ექსკორაციები. არ გამოვრიცხავ, რომ დაშავებულები კატასტროფის მედიციცინის ცენტრის ბრიგადებმა თბილისში გადაიყვანონ", - განუცხადა კახეთის საინფორმაციო ცენტრს საგარეჯოს საავადმყოფოს დირექტორმა დავით ლალიაშვილმა.
მომხდარზე აღძრულია სისხლის სამართლის საქმე. გამოძიებას საპატრულო პოლიცია აწარმოებს.