სომხეთის სიდიდით მეორე ქალაქ გიუმრის მერმა სამველ ბალასანიანმა, რომელიც პარტია „აყვავებული სომხეთის" წევრია, საქართველოში ბიზნეს საქმიანობა დაიწყო.
გაზეთ „გრაპარკის" ინფორმაციით, საქართველომ ბალასანიანს უფლება მისცა ბიზნესი მთელი ქვეყნის მასშტაბით აწარმოოს.
გამოცემის ინფორმაციით, ჯავახეთში ლუდის წარმოების გარდა ის თევზის გადამამუშავებელი საწარმოს მშენებლობასაც გეგმავს. იმავდროულად მის გეგმებში შედის რესტორნების ქსელის განვითარება, ქართული და სომხური ბრენდით. გამოცემის ინფორმაციითვე, ბალასანიანი საქართველოში ბიზნესგარემოსა და საწარმოს მშენებლობისათვის ტერიტორიების დასათვალიერებლად უკვე იმყოფებოდა.
თავად ბალასანიანის პრესამსახურში აღნიშნულ ფაქტს არ ადასტურებენ და განმარტავენ, რომ ბალასანიანმა ჯავახეთის განვითარებაში წვლილის შეტანას მართლაც ცდილობს, რადგანაც მისი თხოვნით ამერიკელი ინვესტორი დათანხმდა, ჯავახეთში ლუდის საწარმო ააშენოს და ახალი სამუშაო ადგილები შექმნას.