სოფლის მეურნეობის მინისტრის პირველმა მოადგილემ დავით შერვაშიძემ საგამოფენო ცენტრში ,,ექსპო-ჯორჯია" სოფლის მეურნეობის, კვების მრეწველობის, გადამამუშავებელი და შესაფუთი ტექნოლოგიების მე-12 საერთაშორისო გამოფენა გახსნა. ქართულ კომპანიებთან ერთად გამოფენაში 10 ქვეყნის (გერმანია, ლიტვა, ავსტრია, კანადა, ესპანეთი, უკრაინა, რუსეთი, თურქეთი, ირანი, სომხეთი) სხვადასხვა კომპანია მონაწილეობს.
,,სოფლის მეურნეობის სამინისტრო ყოველთვის დაუჭერს მხარს ისეთ ღონისძიებებს, რომელიც ხელს შეუწყობს სოფლის მეურნეობის სექტორის განვითარებას და იმ ახალი ტექნოლოგიების გაცნობა-დანერგვას, რაც ფერმერებს საშუალებას მისცემს, სხვადასხვა მიმართულებით გაზარდონ პროდუქტიულობა", - განაცხადა მინისტრის მოადგილემ. დავით შერვაშიძემ აღნიშნა, რომ ბოლო წლების განმავლობაში გამოფენაში მონაწილე ქვეყნების და კომპანიების რაოდენობა გაიზარდა, რაც ძალიან კარგია. უახლოეს მომავალში სოფლის მეურნეობის სამინისტროს ერთ-ერთი პრიორიტეტი კოოპერაცია და კოოპერირების სტიმულაცია იქნება. სოფლის მეურნეობის სექტორში დასაქმებული ფერმერები და მწარმოებლები მსგავს გამოფენებში აქტიურად უნდა ჩაერთონ, რადგან ასეთ ღონისძიებებზე გამოცდილების გაზიარება, თანამედროვე ტექნოლოგიების გაცნობა და ახალი კავშირების დამყარებაა შესაძლებელი.
40 საგამოფენო სტენდზე წარმოდგენილია სასოფლო-სამეურნეო ტექნიკა, მანქანა-დანადგარები, ტარა და შესაფუთი მასალები, სასათბურე და სამაცივრე მეურნეობების დანადგარები, სარწყავი სისტემები, სასმელები და საკვები პროდუქტები (რძის პროდუქტები, ჩაი, ჯემები), ლაბორატორიული აღჭურვილობა, ნერგები, თესლები, სასუქები და პესტიციდები, საკონსულტაციო სერვისი და სატრანსპორტო მომსახურება.
სერთაშორისო გამოფენა 1 დეკემბრამდე გაგრძელდება. სტუმრებს საშუალება ექნებათ უშუალოდ მწარმოებლებისგან მიიღონ სასურველი ინფორმაცია და გაეცნონ ინდუსტრიაში მიმდინარე სიახლეებს.