.,,დიდი მნიშვნელობას ვანიჭებთ ახალ მთავრობასა და პრეზიდენტს შორის კონსტრუქციულ თანამშრომლობას", - განაცხადა ევროკავშირის უმაღლესმა წარმომადგენელმა საგარეო ურთიერთობებისა და უსაფრთხოების საკითხებში ქეთრინ ეშტონმა საქართველოში დაგეგმილი ვიზიტის კომენტირებისას და აღნიშნა, რომ დიდი ინტერესით ელის პრემიერ-მინისტრთან და პრეზიდენტთან შეხვედრას.
,,ბევრი რამ უნდა განვიხილოთ მათ შორის ქვეყანაში მიმდინარე პროგრესი, ასოცირებული შეთანხმებისა და ღრმა და ყოვლისმომცველი სავაჭრო შეთანხმების საკითხები. Aასევე ხაზი მინდა გავუსვა მართლმსაჯულებისა და კანონის უზენაესობის პრინციპის მიუკერძოებელი გამოყენების აუცილებლობასა და იმ ღირებულებებს, რომელიც საერთოა საქართველოსა და ევროკავშირისთვის", _ განაცხადა ეშტონმა.
შეგახსენებთ, რომ დღეს, 26 ნოემბერს, თბილისს რამდენიმე საათით ევროკავშირის უმაღლესი წარმომადგენელი საგარეო ურთიერთობებისა და უსაფრთხოების საკითხებში ევროკომისიის ვიცე-პრეზიდენტი ქეთრინ ეშტონი ეწვევა.
ქეთრინ ეშტონი ვიზიტის ფარგლებში შეხვედრებს გამართავს საქართველოს პრემიერ-მინისტრთან ბიძინა ივანიშვილთან, საქართველოს პრეზიდენტთან მიხეილ სააკაშვილთან და საქართველოს საგარეო საქმეთა მინისტრ მაია ფანჯიკიძესთან.
გამგზავრების წინ, 17:00 საათზე კი სასტუმრო ,,შერატონ მეტეხში პალასში" ქეთრინ ეშტონი მედიის წარმომადგენლებისთვის ბრიფინგს გამართავს. ქეთრინ ეშტონი საქართველოს ცენტრალურ აზიაში პოლიტიკური ტურის დაწყებამდე სტუმრობს. როგორც ეშტონმა რადიო "თავისუფლებისთვის" მიცემულ ინტერვიუში განაცხადა ბიძინა ივანიშვილს მოუწევს დაამტკიცოს, რომ რასაც ის აკეთებს არის ღია და ტრანსფარენტული.
