ყოფილი პრემიერი და შსს ყოფილი მინისტრი ივანე მერაბიშვილი მზადაა გამოძიებასთან ითანამშრომლოს და უპასუხოს ყველა იმ შეკითხვას, რომელიც საზოგადოებასა და პროკურატურას აინტერესებს.
,,ნაციონალური მოძრაობის" გენერალური მდივანი პროკურატურის მიერ მისდამი წაყენებულ ბრალდებებს უსაფუძვლოს უწოდებს.
,,ეს საკითხი იმდენად ბუნდოვანია და როცა ჩემს პერსონას ეხება საკითხი დისკონფორტს ვგრძნობ და არ მეხერხება საკუთარ თავზე საუბარი. ჯობს ყველა ამ საკითხზე სხვამ გააკეთოს შეფასება", _ განაცხადა ,,რუსთავი-2"-თან საუბარში ,,ნაციონალური მოძრაობის" გენერალურმა მდივანმა ივანე მერაბიშვილმა, რომელმაც აღნიშნა, რომ იგი მზადაა გამოძიებასთან ითანამშრომლოს.
ივანე მერაბიშვილი არ გამორიცხავს, რომ პროკურატურამ იგი დააკავოს.
,,ჩვენი პოლიტიკური გუნდი ის გუნდია, რომელიც პატივს სცემს სახელმწიფოს, საქართველოში მოქმედ კანონმდებლობას. Mმე არაფერს არ გამოვრიცხავ, თუმცა ეს არ ცვლის ჩემს განწყობას, ჩემს მოქმედებებსა და გემებს", -განაცხადა მერაბიშვილმა.
შეგახსენებთ, რომ შს სამინისტრომ მთავარ პროკურატურას ყოფილი შს მინისტრ ვანო მერაბიშვილთან დაკავშირებით მასალები გადაუგზავნა. შს სამინისტროს საზოგადოებასთან ურთიერთობის სამსახურის ნინო გიორგობიანის თქმით, ,, საქმე ეხება 2006-2008 წელში ვანო მერაბიშვილის მხრიდან განხორციელებულ უკანონობას. საუბარია, მერაბიშვილის 2006 წლის 13 მარტის ბრძანებაზე, რომლის თანახმად, კონსტიტუციური უსაფრთხოების დეპარტამენტის დირექტორი დათა ახალაია და გენერალური ინსპექციის უფროსი ვასილ სანოძე დროებით გათავისუფლდნენ სამსახურებრივი მოვალეობის შესრულებისგან, რადგან საზოგადოებაში არსებობდა დასაბუთებული ვარაუდი, რომ აღნიშნულ თანამდებობაზე მათი დარჩენით ხელი შეეშლებოდა სანდრო გირგვლიანის სისხლის სამართლოს საქმეზე მიმდინარე გამოძიებას. "სამინისტროს გენერალური ინსპექციის მიერ ჩატარებული სამსახურებრივი მოკვლევის შედეგად დადგინდა, რომ შს მინისტრის ბრძანება დათა ახალაიასა და სანოძისთვის უფლებამოსილების შეჩერების თაობაზე ატარებდა მოჩვენებით, თვალთმაქცურ ხასიათს და გამოცემული იყო მხოლოდ იმ მიზნით, რომ დაკმაყოფილებული ყოფილიყო საზოგადოების დაჟინებული მოთხოვნა ამ პირების თანამდებობიდან გათავისუფლების თაობაზე. სინამდვილეში ახალაია და სანოძე თითქმის 2 წლის განმავლობაში სრული მოცულობით და შეუზღუდავად ხელმძღვანელობდნენ შესაბამის დეპარტამენტებს. მათ ხელი მუწვდებოდათ სახელმწიფო საიდუმლო ინფორმაციებთან და დოკუმენტებთან. ისინი გეგმავდნენ და ხელმძღვანელობდნენ ოპერატიულ საგამოძიებო, აგენტურულ და სხვა ხასიათის სპეციალურ ღონისძიებებს", - განაცხადა ნინო გიორგობიანმა და აღნიშნა, რომ 2008 წლის აგვისტოში შს მინისტრმა გამოსცა ბრძანება დათა ახალაიასა და ვასილ სანოძის შეჩერებული სამსახურებრივი უფლებამოსილების აღდგენის თაობაზე.
