მისი თქმით, იგი დარწმუნებულია, რომ იმ პირობებშიც კი, როცა გაძლიერდა ინსტინქტები, რომ ამდენი წლის განმავლობაში შენებისა და განვითარების შემდეგ ნგრევა მოხდეს და ამისკენ მოწოდებები ისმის, ეს ვერ განხორციელდება იმ მარტივი მიზეზის გამო, რომ ხალხი ამას არ დაუშვებს.

"ჩვენი ქვეყანა კიდევ უფრო მეტად უნდა განვითარდეს და, ჩემის მხრივ, მინდა ვთქვა, რომ ჩემს ხალხთან ერთად ვიყავი მშვიდობის, ომის დროს, გაჭირვების დროს, აღმშენებლობის დროს და მე, რა თქმა უნდა, ჩემს ხალხს არ მივატოვებ არც განსაცდელში. ჩვენ ბოლომდე გადავლახავთ ამ პრობლემებს. ჩვენ გავიყვანთ ჩვენს ქვეყანას სამშვიდობოზე. საქართველოს სხვა პერსპექტივა არა აქვს. მიუხედავად იმისა, როგორი შეხედულებებიც არ უნდა გვქონდეს, ჩვენ უნდა შევინარჩუნოთ სიმშვიდე, ერთიანობა და რწმენა მომავლის. მე დარწმუნებული ვარ, ყველანი გამოვალთ გამარჯვებულები", - აღნიშნა საქართველოს პრეზიდენტმა.

პრეზიდენტმა ასევე ისაუბრა თავად ბაგრატის ტაძარზეც. მისი თქმით, ბაგრატის ტაძარიც არის სიმბოლო, რომელიც ყველანაირმა დამპყრობელმა ანგრია, მიწასთან გაასწორა. ბევრი წინააღმდეგობა შეხვდა მის აღდგენას, მათ შორის ბოლო წლებში, თუმცა მისი აღდგენა მაინც მოხერხდა და დღეს ის მართლაც ულამაზეს და აღსაფრთოვანებელ მდგომარეობაშია.
საქართველოს პრეზიდენტი ბაგრატის ტაძარში დღეს, 12:00 საათისთვის უმცროს ვაჟთან ერთად მივიდა. მასთან ერთად იმყოფებოდნენ იმერეთის გუბერნატორი, ვახტანგ ბალავაძე და ქუთაისის ყოფილი მერი და უმცირესობის წევრი, გიორგი თევდორაძე.
პრეზიდენტი პარაკლისს დაესწრო. მეუფე კალისტრატემ პრეზიდენტს მადლობა გადაუხადა და მადლიერების ნიშნად წმინდა გიორგის ხატი უსახსოვრა.