ის, რაც ჩვენ მოვისმინეთ პრემიერ-მინისტრის ბრიფინგზე, არის უაღრესად საგანგაშო სიგნალი ჩვენი დემოკრატიისთვის , - ამის შესახებ განცხადება უშიშროების საბჭოს მდივანმა გიგა ბოკერიამ საქართველოს პრემიერ-მინისტრის მიერ დღეს გამართული პრეკონფერენციის საპასუხოდ გააკეთა. პრემიერ მინისტრმა პრეკონფერენციაზე განაცხადა, რომ "ნაციონალურ მოძრაობას" როგორც პოლიტიკურ ძალას მომავალი არ აქვს.
ბოკერიას თქმით, დღეს პრემიერმა პირდაპირ თქვა, რომ ის დაპატიმრებები რომელსაც ყველანი ვადევნებთ თვალს არის იმისთვის რომ "ნაციონალური მოძრაობა" როგორც ოპოზიცია არ არსებობს.
"პრაქტიკულად ძალიან გამჭვირვალედ, პირდაპირ და მკაფიოდ ითქვა შემდეგი რომ ის დაპატიმრებების, ის დაჭერების, რომელსაც ჩვენ ყველანი ვადევნებთ თვალყურს პოლიტიკური ოპონენტების, იმ ხალხის ვინც არის დაკავშირებული ნაციონალურ მოძრაობასთან, მოტივი არის არა სამართლიანობისთვის ბრძოლა, არა კონკრეტული დანაშაულის გამოძიება, რომელი მოტივებიც გვესმოდა ზოგჯერ საჯარო გამოსვლებში, არამედ პირდაპირ, რომ ვთქვათ გაღიზიანება იმ ფაქტით, რომ „ნაციონალური მოძრაობა" როგორც პოლიტიკური ოპოზიცია არსებობს, რომ პოლიტიკური ოპოზიცია ხმას იღებს; აკრიტიკებს ახალ ხელისუფლებას. პირდაპირ ითქვა, რომ რიტორიკა აღიზიანებს ხალხს. ამას ეწოდა ეწოდა გონებრივი აგრესია. არ ვიცი ეს რას ნიშნავს ზუსტად. მაგრამ მთავარი ის არის, რომ მოხდა სრული ლუსტრაცია მოტივების. თან დაზუსტდა ის, რომ აქ კონკრეტულ დანაშაულზე კი არ არის საუბარი, ასამართლებენ, ოღონდ სისხლის სამართლის დევნის გამოყენებით პოლიტიკურ ჯგუფს, პოლიტუიკურ ოპოზიციას. პრემიერ-მინისტრმა ივანიშვილმა ისაუბრა რაღაც წითელ ხაზებზე ჩემსაზე. მინდა ძალიან მკაფიოდ განვუმარტო პრემიერ-მინისტრს, მის გუნდს, საზოგადოებას - ეს არ არის ვინმეს პერსონალური წითელი ხაზი, ეს არის დემოკრატიის მინიმალური წითელი ხაზი. იგულისხმება ის რომ როდესაც პოლიტიკური ძალა იგებს არჩევნებს, ამ შემთხვევაში ქართულმა ოცნებამ და მისმა ლიდერმა ივანიშვილმა მოიგო არჩევნები, მოდის მთავრობაში, ამომრჩევლების ნებით, ეს არ ნიშნავს არავითარ შემთხვევაში წაგებული პოლიტიკური ძალის გაქრობას. ეს არ ნიშნავს, რომ არჩევნებში დამარცხებული პოლიტიკური ძალა აღარ აკრიტიკებდეს ხელისუფლებას, ზოგჯერ მწვავედაც კი. ეს არის მინიმალური წითელი ხაზი, რომელიც სამწუხაროდ, როგორც ჩანს, ამ ეტაპზე თავისი პოლიტიკური კარიერისა, პრემიერ-მინისტრს ივანიშვილს და მის გუნდს არ ესმით. ეს არის ძალიან სახიფათო, უმძიმესი შემთხვევა მათ აღქმაში",- განაცხადა ბოკერიამ.