საქართველოს საგარეო საქმეთა სამინისტროში საგარეო საქმეთა მინისტრი მაია ფანჯიკიძე და საგარეო საქმეთა მინისტრის მოადგილე ნიკა ვაშაკიძე ჟენევის საერთაშორისო მოლაპარაკებათა თანათავმჯდომარეებს შეხვდნენ. სამინისტროს ინფორმაციით, შეხვედრას ესწრებოდნენ სამხრეთ კავკასიისა და საქართველოში კრიზისის საკითხებში ევროკავშირის სპეციალური წარმომადგენელი ფილიპ ლეფორი, ჟენევის საერთაშორისო მოლაპარაკებებზე გაერო-ს წარმომადგენელი ანტი ტურუნენი, ეუთო-ს თავმჯდომარე ქვეყნის, ირლანდიის სპეციალური წარმომადგენელი სამხრეთ კავკასიაში პადრეგ მარფი და ეუთოს მომავალი თავმჯდომარის, უკრაინის სპეციალური წარმომადგენელი ანდრიი დეშიცა.
შეხვედრაზე საქართველოს საგარეო საქმეთა მინისტრმა ხაზი გაუსვა ჟენევის მოლაპარაკებების, როგორც უსაფრთხოების, სტაბილურობისა და ჰუმანიტარული საკითხების შესახებ არსებული ფორმატის მნიშვნელობას და მისი გაძლიერების აუცილებლობას. ქართულმა მხარემ აღნიშნა ძალის გამოუყენებლობის შესახებ განცხადებაზე მუშაობის მნიშვნელობა. მინისტრმა განსაკუთრებული ყურადღება გაამახვილა ასევე იძულებით გადაადგილებული პირებისა და ადამიანის უფლებების საკითხებზე სამუშაოს გააქტიურების მნიშვნელობაზე.
მხარეებმა კიდევ ერთხელ აღნიშნეს ქმედითი ნაბიჯების გადადგმის საჭიროება ინციდენტების პრევენციისა და რეაგირების გალის მექანიზმის აღდგენის უზრუნველსაყოფად. ქართულმა მხარემ იმედი გამოთქვა, რომ კონსტრუქციული და დინამიკური მონაწილეობის გზით შესაძლებელი გახდება პროგრესის მიღწევა.
