პოლიტიკურ ძალას, რომელიც წინასაარჩევნო დაპირებებს ვერ ასრულებს, ხელს არ აძლევს ობიექტური, დაბალანსებული საზოგადოებრივი მაუწყებელი", - განაცხადა ჟურნალისტებთან "ნაციონალური მოძრაობის" ერთ-ერთმა ლიდერმა ჩიორა თაქთაქიშვილმა პრემიერ-მინისტრ ბიძინა ივანიშვილის განცხადების კომენტირებისას.
"ბიძინა ივანიშვილის განცხადებამ საზოგადოებრივ მაუწყებელთან დაკავშირებით დაადასტურა ის მოტივები, თუ რატომ მოხდა საზოგადოებრივ მაუწყებელში ხადურის უწყების შესვლა. ცხადია, რომ პრემიერ-მინისტრს განსაზღვრული აქვს, არა მარტო პარლამენტი, მთავრობა, სასამართლო, პროკურატურა დაიქვემდებაროს, არამედ მას სურს საზოგადოებრივი მაუწყებლის დაქვემდებარება. ესაა ტელევიზია, რომელმაც შეძლო არა მარტო წინასაარჩევნო პერიოდში, არამედ მთლიანად საქართველოში დაბალანსებული და ნეიტრალური ინფორმაციის მიწოდება საზოგადოებისთვის", - განაცხადა თაქთაქიშვილმა, რომელმაც აღნიშნა, რომ პოლიტიკურ ძალას, რომელიც წინასაარჩევნო დაპირებებს ვერ ასრულებს, ხელს არ აძლევს ობიექტური, დაბალანსებული საზოგადოებრივი მაუწყებელი.
შეგახსენებთ, რომ ივანიშვილი მზად არის, ტელეკომპანია "მეცხრე არხის" ქონება მთლიანად საზოგადოებრივ მაუწყებელს გადასცეს. წინააღმდეგ შემთხვევაში, "ჭეშმარიტად საზოგადოებრივი მაუწყებლის" შექმნის პერსპექტივას ივანიშვილი "მეცხრე არხის" ბაზაზე ხედავს.როგორც პრემიერ-მინისტრმა სასტუმრო "რადისონში" გამართულ პრესკონფერენციაზე განაცხადა, მას, როგორც პრემიერ-მინისტრს არ სურს, მისი მეუღლე ტელეკომპანიაში წილს ფლობდეს.
