კახი კალაძე ფიქრობს, არსებული გაურკვევლობა ინვესტორის ბიზნესინტერესებს არ დააზარალებს და ინვესტორი „არ გაიქცევა", რადგანაც ენერგეტიკის მინისტრის თქმით, ასეთი დიდი ჰესების მშენებლობა ინვესტორებისათვის საკმაოდ მომგებიანია.

შეგახსენებთ, რომ მდინარე ენგურზე 650 მეგავატი სიმძლავრის ჰიდროელექტროსადგურის - ხუდონჰესის - მშენებლობას კომპანია Trans Electrica Limited-ი გეგმავს.

აღსანიშნავია, რომ საქართველოს მთავრობამ Trans Electrica Limited-თან
ხელშეკრულება „ხუდონჰესის" მშენებლობის ტექნიკურ-ეკონომიკური შესწავლის შესახებ 2007 წელს გააფორმა. 2011 წლის 21 აპრილის მთავრობის სხდომაზე, სადაც პრაქტიკულად გამოცხადდა „ხუდონჰესის" მშენებლობის დაწყება, საქართველოს პრემიერ-მინისტრმა ნიკა გილაურმა აღნიშნა, რომ კვლევა სასურველი შედეგით დასრულდა: წინა მთავრობასთან შეთანხმებული გეგმის მიხედვით, ჰესის მშენებლობა, მშენებლობის ნებართვის გაცემიდან 6 წელიწადში უნდა დასრულებულიყო, რისთვისაც ინვესტორი 1 მლრდ დოლარის ინვესტიციის განხორციელებას აპირებს, აქედან 600 მილიონი დოლარი კაშხლის მშენებლობისთვისაა განკუთვნილი, 400 მილიონი კი მოსახლეობის განსახლებასა და სოციალურ მოთხოვნილებებს მოხმარდება.

გარემოსდამცველების განმარტებით, კი "ხუდონჰესისთვის" დაახლოებით 200 მეტრის კაშხლისა და რეზერვუარის მშენებლობა სოფელ ხაიშის დატბორვას გამოიწვევს, რის გამოც ადგილობრივი მცხოვრებლების სოფლიდან გასახლება გახდება საჭირო. საუბარია 528 ჰექტარი მიწის ფართობის დატბორვაზე. დატბორვის საფრთხის წინაშე კი 250-მდე ოჯახი დგას.

მდინარე ენგურზე ხუდონის კაშხლის მშენებლობა 1986 წელს დაიწყო, თუმცა მოსალოდნელი ეკოლოგიური პრობლემების გამო, საპროტესტო აქციების მძლავრი ტალღის ფონზე, შეჩერდა.