ისრაელის თავდაცვის მინისტრმა ეჰუდ ბარაკმა სამხედრო სამსახურში 30 ათასი რეზერვისტი გაიწვია. თავდაცვის მინისტრის გადაწყვეტილებამ გააჩინა მოსაზრება, რომ ისრაელი ღაზას სექტორში სახმელეთო შეტევისთვის ემზადება.
გუშინ ღაზას სექტორიდან თელ-ავივის მიმართულებით ორი რაკეტა იქნა გაშვებული. ისრაელის დედაქალაქში, ბოლო 20 წლის განმავლობაში პირველად, საჰაერო განგაში გამოცხადდა.
ანალიტიკოსები აცხადებენ, რომ პალესტინელების მხრიდან თელ-ავივის დაბომბვის გადაწყვეტილება კონფლიქტის ესკალაციას ნიშნავს.
გავრცელებული ინფორმაციით, ისრაელის რაკეტსაწინააღმდეგო სისტემის ეფექტური მოქმედების შედეგად, ერთი რაკეტა ქალაქ რიშონ-ლე-ციონთან, თელ-ავივიდან სამხრეთით, მეორე კი ზღვაში ჩავარდა.
ბოლო ორი დღის საბრძოლო დაპირისპირებას ისრაელის მხრიდან სამი პალესტინის მხრიდან 15 ადამიანი შეეწირა.
14 ნოემბრიდან ისრაელის მიმართულებით ღაზას სექტორიდან 300 ჭურვი იქნა ნასროლი. უმეტესი მათგანი რაკეტსაწინააღმდეგო სისტემამ მოიგერია, თუმცა ერთი ჭურვი ქალაქ ქირიატ-მალახში მდებარე საცხოვრებელ სახლს მოხვდა, რის შედეგადაც ორი ქალი და ერთი მამაკაცი დაიღუპა.
"ისლამური ჯიჰადის" სამხედრო ფრთის განცხადებით, თელ-ავივისკენ გაშვებული იქნა ირანში დამზადებული რაკეტა.
15 დაღუპული პალესტინელიდან უმეტესობა შეიარაღებული დაჯგუფებების წევრია. თუმცა დაღუპულთა შორის 4 ბავშვია. მათ შორის დაიღუპა ბი-ბი-სის არაბეთის სამსახურის თანამშრომლის ჯიხად მიშარაუის 11 თვის ვაჟი.
ისრაელის პრემიერ-მინისტრმა ბენიამინ ნეთანიაღუმ განაცხადა, რომ ისრაელი ყველაფერს გააკეთებს იმისათვის, რათა მის დაპირისპირებაში ჰამასის დაჯგუფებასთან, შესძლოს მაქსიმალურად აიცილოს თავიდან მსხვერპლი მშვიდობიან მოსახლეობას შორის.
