ქართული მხარე, რუსეთში ქართული ღვინის გატანასთან დაკავშირებით, რუსეთის ოფიციალური პასუხის მოლოდინშია. რუსულმა მხარემ ზეპირსიტყვიერი განცხადებები მზადყოფნაზე უკვე გააკეთა და ამჯერად ქართული მხარე ოფიციალურ წერილს, ან შესაბამის დოკუმენტს ელოდება, რათა ურთიერთობების დარეგულირებისთვის სხვა ქმედითი ნაბიჯები დადაიდგეს.
როგორც სააგენტო „ჯი-ეიჩ-ენთან" საუბრისას სოფლის მეურნეობის მინისტრმა დავით კირვალიძემ განაცხადა, ზეპირი განცხადებების შემდეგ, რუსული მხარიდან ოფიციალური პასუხიც მალე იქნება და ქართულ მხარეს შეეძლებს რუსეთ-საქართველოს შორის დაწყებული მოლაპარაკებები, ქართული პროდუქციის რუსეთის ბაზარზე დაბრუნებასთან დაკავშირებით, სხვა ასპექტში გადაიყვანოს.
„რუსული მხარის განცხადებები, რაც გაკეთდა საგარეო საქმეთა მინისტრის მოადგილის და თავად გენადი ონიშენკოს მხრიდან არის ძალიან კარგი ნაბიჯი, რასაც ჩვენ პოზიტიურად აღვიქვამთ. რუსეთისგან ველით შემდეგ ქმედით ნაბიჯებს, რათა სრულფასოვნად აღვადგინოთ სავაჭრო-ეკონომიკა ურთიერთობები. თუმცა რა ნაბიჯები უნდა გადაიდგას სამომავლოდ ეს დამოკიდებულია რუსული მხარის ოფიციალურ ქმედებებზე. ჩვენი მხრიდან რუსეთში ოფიციალურად, ბიზნესის სახელით წერილობით მიმართვა გაიგზავნა. მეღვინეთა ასოციაციამ და ბიზნეს ფედერაციებმა მოგვმართეს თხოვნით, რომ მათი წერილი, რომელიც განკუთვნილი იყო ონიშენკოსადმი, რუსული მხარისთვის გადაგვეგზავნა. საგარეო საქმეთა სამინისტროს მეშვეობით წერილი გასულ კვირას ოფიციალურად გაიგზავნა. ახლა ალბად ძალიან მალე მივიღებთ ოფიციალურ პასუხს, რადგანაც საგარეო უწყების განცხადება ნიშნავს უკვე მზადყოფნას. თუმცა იმისათვის, რომ კონკრეტული საქმიანობები დავგეგმოთ, ამისათვის ოფიციალურ პასუხს დაველოდებით. როგორც იცით ისინი გამოთქვამდნენ სურვილს, ჩამოსულიყვნენ საქართველოში და ადგილზე ენახათ და ადგილზე გაცნობოდნენ ადგილობრივი ინსპექტირების სისტემას. ამაზე ჩვენი მხრიდან სრული მზადყოფნაა. იყო შეკითხვა, რომ ჩვენი მხრიდან ხომ არ იქნებოდა ხელშეშლა იმ ბიზნესების მიმართ, ვინც რუსულ ბაზარზე შესვლას გადაწყვეტდა. თუმცა ჩვენი მხრიდან იყო განცხადება, რომ ჩვენ პირიქით ამ პროცესს მივესალმებით"- აცხადებს "ჯი-ეიჩ-ენთან" საუბარში დავით კირვალიძე.
მინისტრი დარწმუნებულია, რომ ქართული პროდქცია და უფრო კონკრეტულად კი ქართული ღვინო რუსული ბაზრის მოთხოვნებს დააკმაყოფილებს.
„ქართული პროდუქცია დღეს ძალიან ბევრ ბაზარზეა წარმოდგენილი. მართალია მცირე რაოდენობით ვიდრე შეიძლებოდა ყოფილიყო, თუმც პროცესი ვითარდება. ბიზნესი ძალიან დიდი ყურადღებას აქცევს იმ მოთხოვნებს, რასაც ესა თუ ის ბაზარი უყენებს. ამა თუ იმ ბაზარზე შესვლას როდესაც გეგმავ, აუცილებლად უნდა დააკმაყოფილო ის მოთხოვნები, რომელიც ამ ბაზრის მხრიდანა წამოყენებული, რადგანაც ჩვენი პროდუქცია უკვე წარმოდგენილია ისეთ მნიშვნელოვან ბაზრებზე, როგორიცაა ევროკავშირი და აშშ, რაც თავის მხრივ, ეს იმას ნიშნავს, რომ ჩვენი პროდუქცია მოთხოვნებს აკმაყოფილებს"- აცხადებს დავით კირვალიძე.
შეგახსენებთ, რომ რუსეთის საგარეო საქმეთა მინისტრის მოადგილემ ანდრეი დინისოვმა ქართული ღვინის რუსეთის ბაზარზე დაბრუნებასთან დაკავშირებით კომენტარი გააკეთა.
"თუ ვისაუბრებთ კონკრეტულ საქმეებზე, საუბარია ჩვენს ბაზარზე ქართული ღვინის დაბრუნების თაობაზე. ყოველ შემთხვევაში არის მზადყოფნა ორივე მხრიდან ამ საკითხის პრაქტიკულად განსახორციელებლად", - განაცხადა დინისოვმა.
აღსანიშნავია, რომ საქართველოს პრემიერ-მინისტრის ბიძინა ივანიშვილის ინიციატივით, ზურაბ აბაშიძე რუსეთში პრემიერ-მინისტრის პირად წარმომადგენლად ცოტახნის უკან დაინიშნა, რომელსაც ორ ქვეყანას შორის ამ მიმართულებით სიტუაციის გარკვევა და პრობლემების მოგვარება დაევალა.
იმავდროულად, ცოტახნის უკან "როსპოტრებნადზორის" ხელმძღვანელმა გენადი ონიშენკომ განაცხადა, რომ მისი უწყება მზად არის მოთხოვნის განსახილველად, რომელიც რუსეთის ბაზარზე ქართული ღვინოებისა და მინერალური წყლის დაშვებას ეხება.
მისივე თქმით, "როსპოტრებნადზორი" ქართული მხრიდან მხოლოდ ოფიციალურ მოთხოვნას ელოდება. ამასთან ერთად ასევე აუცილებელი პირობაა უწყების სპეციალისტების საქართველოში ჩასვლა, რომლებიც ადგილობრივი დაწესებულებების ინსპექტირებას განახორციელებენ.
