საქართველოს ხელისუფლება აუცილებლად ეცდება ტარიფების შემცირებას, - განაცხადა ჟურნალისტებთან ბიძინა ივანიშვილმა აზერბაიჯანის სახელმწიფო ნავთობკომპანია "სოკარის" გენერალურ დირექტორ როვნაგ აბდულაევთან შეხვედრის შემდეგ. როგორც პრემიერმა აღნიშნა, შეხვედრა გაცნობითი ხასიათის იყო და მას შს მინისტრი ირაკლი ღარიბაშვილი და ენერგეტიკის მინისტრი კახა კალაძე ეწრებოდნენ.
"საუბარი იყო როგორც ნავთობზე, გაზზე, ისე პოლიტიკაზე. ვისაუბრეთ ჩვენს ურთიერთობებზე, რომელიც ძალიან კარგია და ერთ-ერთი მაგალითია, თუ როგორი დამოკიდებულება უნდა გვქონდეს მეზობელ სახელმწიფოსთან. ამასთან, იყო საუბარი მაღალი დონის შეხვედრების დაგეგმვაზე, კერძოდ, პრეზიდენტთან. უნდა ნახოთ, რა კარგი შენობა აქვს "სოკარს" საქართველოში აშენებული. ის ძალიან გემოვნებით არის მოწყობილი და შეიძლება საქართველოში ასეთი გემოვნებით აშენებული შენობა არც იყოს", - განაცხადა ივანიშვილმა, რომელმაც აღნიშნა, რომ ტარიფების დაწევასთან დაკავშირებით ბევრი პრობლემა არსებობს.
"ვფიქრობ, ტარიფებთან დაკავშირებით შიგნით უფრო ბევრი პრობლემაა მოსაგვარებელი, ვიდრე გარედან, რადგან ვფიქრობ, რომ ხელოვნურად ხდებოდა ტარიფების აწევა. საქართველოს ხელისუფლება აუცილებლად ეცდება ტარიფების შემცირებას", -განაცხადა ივანიშვილმა.
