"2010 წლის ოქტომბრიდან "ნეიტრალური პასპორტი" აფხაზეთში მცხოვრბმა 27-მა ადამიანმა აიღო. ამავე დროში ქართული პასპორტი აიღო მნიშვნელოვნად მეტმა", - განაცხადა დღეს თბილისში მოწყობილ პრესკონფერენციაზე საქართველოს სახელმწიფო მინისტრმა რეინტეგრაციის საკითხებში პაატა ზაქარეიშვილმა.
"აფხაზეთისთვის "ნეიტრალური პასპორტი" ისეთივე პასპორტია, როგორიც ქართული პასპორტი. ასე რომ, თუ აფხაზი გადალახავს რაღაც მორალურ დონეს და იღებს ან შეიძლება აიღოს "ნეიტრალური პასპორტი", იგი უფრო იოლად აიღებს ქართულ პასპორტს. რატომ? იმიტომ, რომ ქართული პასპორტი დაწერილია არა კონრეტულად მათთვის - ის დაწერილია მთელი საქართველოსთვის, ეს არ არის პოლიტიკური დოკუმენტი", _ აცხადებს ზაქარეიშვილი.
მისი თქმით, "ნეიტრალური პასპორტი" ოკუპირებულ რეგიონებში მცხოვრები ადამიანების ცნობიერებაში არის მათ წინააღმდეგ დაწერილი პროექტი.
"ნეიტრალური პასპორტი" კი, მათი გაგებით და მათ ცნობიერებაში, არის პროექტი, რომელიც მათ წინააღმდეგაა დაწერილი. მეტიც, მათ, ვინც "ნეიტრალურ პასპორტს" აიღებენ, სხვები მეტ მოღალატეებად რაცხავენ, ვიდრე მათ, ვინც ქართულ პასპორტს აიღებს. იმიტომ, რომ ქართულ პასპორტის დონე უფრო დაბალი აქვს, ნეიტრალურ პასპორტს უფრო მაღალი და ეს ასეა. ასე რომ, აფხაზი, რომელიც მზად არის აიღოს "ნეიტრალური პასპორტი", მეორეს აიღებს, წმინდა მორალური და წმინდა პრაგმატული თვალსაზრისითაც კი. "ნეიტრალური პასპორტი" გაძლევს უფლებას, შეხვიდე მხოლოდ 10 სახელმწიფოში, ქართული პასპორტი კი - მთელს მსოფლიოში. ანუ წმინდა პრაგმატულად, თუ ადამიანმა რაღაც მორალური ბარიერი გადალახა, ის პრაგმატულად იღებს გადაწყვეტილებას, აიღოს უფრო მოსახერხებელი და კომფორული პასპორტი, ვიდრე ერთგვარად უფრო პოლიტიზებული", _ აცხადებს ზაქარეიშვილი და აღნიშნავს, რომ მიუხედავად ამისა, პრაგმატული მოსაზრებებიდან გამომდინარე, ამ პასპორტებმა მოქმედება უნდა გააგრძელონ.
"მიმაჩნია, რომ ეს პასპორტები უნდა დავტოვოთ იმ ადამიანებისთვის, რომლებსაც შეუძლიათ იმ დასკვნამდე მივიდნენ, რომ უმჯობესია აიღო ალტერნატიული დოკუმენტი, პასპორტი, ვიდრე საქართველოს პასპორტი. მადლობას ვუხდით ყველა იმ სახელმწიფოს, რომლებმაც აღიარეს ეს დოკუმენტი, რადგან საქართველოს მრავალ მოქალაქეს, რომლებიც აფხაზეთსა და სამხრეთ ოსეთში ცხოვრობს და უარს აცხადებს მათ ბუნებრივ მოქალაქეობაზე, ჰქონდეს საშუალება არჩევნისა - აიღოს ან ქართული, ან ნეიტრალური პასპორტი", - აცხადებს ზაქარეიშვილი.
