"აგვიტოს ომის გმირი დაკავებულია იმ ვითარებაში, რომელიც არ შეესაბამება არც ოფიცრის და არც შეიარაღებული ძალების პატივისცემას", -განაცხადა საქართველოს პრეზიდენტმა მიხეილ სააკაშვილმა გიორგი კალანდაძის დაკავების კომენტირებისას. მან ბოლოდროინდელი პროცესებიც შეაფასა და აღნიშნა, რომ შეშფოთებულია.
"ბოლო მოვლენები ჩემთვის არის შეშფოთების წყარო იმიტომ, რომ დღეს, როგორც არასდროს, ჩვენ გვჭირდება კანონის უზენაესობა. ევროპული ორიენტაცია და საქართველოს განვითარება და წინსვლა - ეს ზოგადი კატეგორიები არ არის, ეს ეფუძნება კონკრეტულ კრიტერიუმებს. ეს კრიტერიუმები არის ჩვენი მოქალაქეების უფლებების პატივისცემა, ეს არის კანონის უზენაესობის დამკვიდრება ყველა დონეზე, ეს არის ინსტიტუტების პატივისცემა. ინსტიტუტების პატივისცემა - ეს არის ჩვენი შეიარაღებული ძალების პატივისცემა", -განაცხადა პრეზიდენტმა და აღნიშნა, რომ 2008 წლის აგვიტოს ომის გმირი დაკავებულია იმ ვითარებაში, რომელიც არ შეესაბამება არც ოფიცრის და არც შეიარაღებული ძალების პატივისცემას.
პრეზიდენტის განცხადებით, კანონის წინაშე ყველა თანასწორია, მაგრამ არსებობს ჩარჩოები, რომლის ფარგლებში კანონი დაცული უნდა იყოს.
შეგახსენებთ, რომ სამართალდამცავებმა თავდაცვისა და შსს ყოფილი მინისტრი, გაერთიანებული შტაბის ყოფილი ხელმძღვანელი და მეოთხე ქვეითი ბრიგადის ყოფილი ხელმძღვანელი დააკავეს. მათ ამ დრომდე ბრალი წაყენებული არ აქვთ.
