დევნილთა და განსახლების სამინისტრო განცხადებას ავრცელებს და აცხადებს, რომ ბაქოს ქუჩა #1, ყოფილი პოლიკლინიკის შენობა, სადაც ამჟამად დევნილები არიან შეჭრილები, არის თბილისის მერიის ბალანსზე არსებულო შენობა, რომელიც 2012 წლის 15 მარტს ქონების მართვის სააგენტომ გადასცა დევნილთა სამინისტროს რეაბილიტაციისა და შემდგომში დევნილთა განსასახლებლად.
მათი განცხადებით, სამინისტრომ, აღნიშნულ ობიექტში განახორციელა სარემონტო სარეაბილიტაციო სამუშაო, "ბამბის ნართის" ნგრევად შენობაში მცხოვრებ დევნილთა გადასაყვანად.
"რაც შეეხება ბაქოს ქუჩა #1-ში შეჭრილ დევნილებს, სამეთვალყურეო საბჭოს გადაწყვეტილებით (რომლის შემადგენლობაში შედიან საერთაშორისო დონორი და პარტნიორი ორგანიზაციები, ასევე ქართული არასამთავრობო ორგანიზაციები) შექმნილმა სამუშაო და მონიტორინგის ჯგუფებმა (დანიის ლტოლვილთა საბჭო; გაეროს ლტოლვილტა უმაღლესი კომისარიატი; ახალგაზრდა იურისტთა ასოციაცია; ნორვეგიის ლტოლვილთა საბჭო და სხვა ორგანიზაციები) შეისწავლეს თითოეული ოჯახი. შესწავლის შედეგად მიღებული ინფორმაცია დასტურდება თავად აღნიშნული ორგანიზაციების წარმომადგენელთა ხელმოწერებით", - ნათქვამია განცხადებაში.
შეგახსენებთ, რომ დღეს ბაქოს ქუჩაზე შეჭრილმა დევნილებმა "დევნილთა სამოქალაქო საზოგადოების კოალიციის" თავმჯდომარე ლელა გულედანთან ერთად აქცია გამართეს. გულედანმა შეჭრილ დევნილთა შესწავლა ეჭვქვეშ დააყენა და მოითხოვა შენობის მესაკუთრის დასახელება.
