ბელარუსმა, შესაძლოა, აფხაზეთისა და ცხინვალის რეგიონის აღიარების საკითხს გადახედოს. ეს არ გამორიცხა ბელორუსის საგარეო საქმეთა მინისტრმა ვლადიმერ მაკეიმ დღეს რუსეთის საგარეო საქმეთა მინისტრთან სერგეი ლავროვთან გამართული შეხვედრის შემდეგ.
მართალია, მან ასევე აღნიშნა, რომ ხელისუფლების პოზიცია ამ მიმართულებით ალბათ არ შეცვლილა, მაგრამ ისინი სიტუაციის ანალიზს განახორციელებენ.
მაკეიმ, რომელიც დღეს ლავროვს ხვდებოდა, მას დასავლეთის იდეოლოგიური ზეწოლისთვის წინააღმდეგობის გაწევა შესთავაზა. მაკეიმ ასევე აღნიშნა, რომ მან და რუსეთის საგარეო საქმეთა მინისტრმა დღეს ბელარუს-საქართველოს და რუსეთ საქართველოს ურთიერთობებზე ისაუბრეს და არც აფხაზეთისა და ე.წ. სამხრეთ ოსეთის აღიარების საკითხი დატოვეს უყურადღებოდ.
"ვერ ვიტყვი, რომ დღეისთვის ჩვენი პოზიცია შეიცვალა, მაგრამ ცხოვრება ადგილზე არ დგას. ჩვენ პოსტსაბჭოთა სივრცესა და საერთაშორისო არენაზე სიტუაციის ანალიზს მოვახდენთ და რა თქმა უნდა გადაწყვეტილებებს ჩვენი ნაციონალური ინტერესებიდან გამომდინარე მივიღებთ", _ განაცხადა ბელორუსის საგარეო საქმეთა მინისტრმა მინსკის მიერ აფხაზეთისა და ე.წ. სამხრეთ ოსეთის დამოუკიდებლობის აღიარების კომენტირებისას.
"ჩვენ ერთობლივად წინ უნდა აღვუდგეთ მათ, ვისაც იერიში მოაქვს უფლებების დამცავ თემატიკაზე ჩვენზე და თქვენზე. ჩვენ დიდი სამამულო ომის ფალსიფიკაციას უნდა ვებრძოლოთ და ინტერნეტის პოლიტიკურ მნიშვნელობას თვალი უნდა მივადევნოთ", - განუცხადა მან ლავროვს.
მისი რუსი კოლეგა გამონთქვამებში უფრო ფრთხილი იყო, თუმცა მთლიანობაში იგი თავის ბელარუს კოლეგას დაეთანხმა. მოლაპარაკებების შემდეგ მაკეიმ აღნიშნა, რომ საგარეო პოლიტიკაში არავითარი აზრთა სხვადასხვაობა რუსეთსა და ბელორუსს არა აქვთ. რუსული მედია აღნიშნავს, რომ მისი ამ განცხადების წინააღმდეგ არც სერგეი ლავროვი წასულა.
