23-24 ოქტომბერს თბილისში, სასტუმრო "შერატონ მეტეხი პალასში", გერმანიის ფედერაციული რესპუბლიკის ეკონომიკური თანამშრომლობის სამინისტროსა და საქართველოს დამსაქმებელთა ასოციაციის ორგანიზებით, ეკონომიკის საერთაშორისო საგანმანათლებლო კონფერენცია გაიმართება. მასში მონაწილეობას მიიღებენ საქართველოს, აზერბაიჯანისა და სომხეთის განათლების სამინისტროების და მეწარმეთა გაერთიანებების წარმომადგენლები. სიტყვით გამოვლენ ქართული ბიზნესკომპანიებისა და პროფესიული საგანმანათლებლო დაწესებულებების ექსპერტები.
ორგანიზატორთა განცხადებით, საქართველოში, სომხეთსა და აზერბაიჯანში მიმდინარე პროფესიული განათლების რეფორმები მნიშვნელოვან ადგილს იკავებს თანამშრომლობის პროექტში და დაგეგმილი ღონისძიება მიზნად ისახავს ამ ქვეყნებში პროფესიული განათლების სისტემაში ბიზნესგაერთიანებების მონაწილეობის გაძლიერებას. კონფერენციაზე განიხილება გერმანულ განათლების სისტემაში ბიზნესის ჩართულობის ასპექტები და გაზიარებულ იქნება ქვეყნებს შორის არსებული გამოცდილება.
საქართველოს დამსაქმებელთა (მეწარმეთა) ასოციაციამ პროფესიული განათლების სისტემის შემდგომი განვითარების მიზნით ბიზნესკომპანიებსა და პროფესიულ საგანმანათლებლო დაწესებულებებთან ერთად შეიმუშავა საკუთარი ხედვა (კონცეფცია), სადაც მნიშვნელოვანი ადგილი უკავია ამ სფეროში კვალიფიციური კადრების მოთხოვნა-მიწოდების ბალანსის გაუმჯობესების მექანიზმებს. კონფერენციაზე ამ ხედვას საზოგადოებასა და ახალი ხელისუფლების წარმომადგენლებს ერთობლივი პრინციპული მიდგომებისა და სამოქმედო გეგმების განსასაზღვრად გააცნობენ. ღონისძიებაზე ძირითადი მოხსენების დასრულების შემდეგ მედიისთვის პრესკონფერენცია გაიმართება.
