ბათუმის ყინულის სასახლის საგამოფენო პავილიონში სამშენებლო მასალებისა და დიზაინის საერთაშორისო გამოფენა ორგანიზატორებთან ერთად აჭარის მთავრობის თავმჯდომარემ გახსნა. ლევან ვარშალომიძემ საგამოფენო დარბაზის ყველა პავილიონი მოინახულა და კომპანიების მიერ წარმოდგენილ პროდუქციას გაეცნო.
გამოფენაზე პროდუქცია 80-მდე კომპანიამ გამოიტანა, რომელთა შორის 30 ქართული, დანარჩენები კი თურქული, აზერბაიჯანული და ირანული კომპანიებია. სამშენებლო პროდუქცია წელს გამოფენაზე ისრაელიდანაც წარმოადგინეს.
სამშენებლო მასალებისა და დიზაინის გამოფენა ბათუმში უკვე მეორედ ტარდება. მას ორგანიზებას კომპანია "ჯეონეტ ექსპოსთან" ერთად, აჭარის ფინანსთა და ეკონომიკის სამინისტრო უწევს. სამშენებლო პროდუქციის რეკლამირების გარდა, გამოფენის მიზანი ახალი ბიზნესპარტნიორების მოძიებაა. სამშენებლო და დიზაინის საერთაშორისო გამოფენა 21 ოქტომბრამდე გაგრძელდება.
