სემეკი მედიას ინფორმაციის არასრულყოფილი ინტერპრეტირებაში ადანაშაულებს. საქართველოს ენერგეტიკისა და წყალმომარაგების მარეგულირებელი ეროვნული კომისია (სემეკი) აცხადებს, რომ ბოლო დღეების განმავლობაში, კომისიის მიერ სამომხმარებლო ტარიფების შესახებ გაკეთებულ კომენტარებზე, მედიის მხრიდან ხდება არასრულყოფილი ინტერპრეტირება. კერძოდ, თითქოსდა, კომისია კატეგორიულად ეწინააღმდეგება ტარიფების შემცირებას, რაც არასწორია!
"კომისიას არცერთ ინტერვიუში არ განუცხადებია, რომ ტარიფების შემცირება შეუძლებელია. კომისია, ყოველთვის აღნიშნავდა, რომ დღეისათვის მოქმედი ტარიფები დადგენილია კანონმდებლობის შესაბამისად და მისი გადახედვა შესაძლებელია, თუ იქნება კანონდებლობით გათვალისწინებული შესაბამისი საფუძვლები.
მიუხედავად იმისა, რომ დღეისათვის ენერგეტიკისა და წყალმომარაგების სექტორებში დადგენილია ზღვრული სამომხმარებლო ტარიფები. კომისია მზად არის ექსპერტებთან და დაინტერესებულ პირებთან ერთად დეტალურად განიხილოს და იმსჯელოს როგორც არსებულ სატარიფო მეთოდოლოგიებსა და ტარიფებზე, ასევე ზღვრული სამომხმარებლო ტარიფების გადახედვაზე"- ნათქვამია სემეკის მიერ გავრცელებულ განცხადებაში.
