მთავრობის კანცელარიაში საქართველოს მთავრობის სახელით საქართველოს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა თორნიკე გორდაძემ ევროკავშირ-საქართველოს თანამშრომლობის ფარგლებში ხელი მოაწერა 2011 წლის სამოქმედო გეგმით გათვალისწინებულ ორ საფინანსო შეთანხმებას, რომლის საერთო ბიუჯეტი 23 მლნ. ევროა :სექტორული პოლიტიკის მხარაჭერის პროგრამა „იძულებით გადაადგილებულ პირთა და მიმღები თემის მხარდასაჭერად" - 19 მილიონი ევრო და კონფლიქტის მშვიდობიანი მოგვარების პროგრამა - 4 მილიონი ევრო.
ხელმოწერის ცერემონიალს ესწრებოდა საქართველოში ევროკავშირის წარმომადგენლობის ხელმძღვანელი, ელჩი ფილიპ დიმიტროვი. დოკუმენტებს ევროკომისიის სახელით, ბრიუსელში უკვე მოაწერა ხელი ევროკომისიის განვითარებისა და თანამშრომლობის დირექტორატის ხელმძღვანელმა მარკუს კორნარომ.
აღსანიშნავია, რომ სექტორული პოლიტიკის მხარაჭერის პროგრამის „იძულებით გადაადგილებულ პირთა და მიმღები თემის მხარდასაჭერად" საფინანსო შეთანხმება მიზნად ისახავს საქართველოსში იძულებით გადაადგილებულ პირთათვის გრძელვადიანი საცხოვრებელი პირობებით უზრუნველყოფას და სიღარიბის პროექტების განხორციელებას.
კონფლიქტის მშვიდობიანი მოგვარების პროგრამის ფარგლებში გათვალისწინებულია კონფლიქტით დაზარალებულ მოსახლეობაში ნდობის აღდგენის ღონისძიებები, ძირითადი ინფრასტრუქტურისა და საცხოვრებელი პირობების გაუმჯობესება და შემოსავლების გენერირების ხელშეწყობა.
