დღეს დილით მომხდარ ინციდენტთან დაკავშირებით, პროკრედიტ ბანკი ოფიციალურ კომენტარს აკეთებს.
"დღეს დილას პროკრედიტ ბანკის დიღმის სერვისპუნქტში, დაახლოებით 9:45-ზე, უცნობი პირი შეიჭრა ფილიალში და მოახერხა გარკვეული თანხის გატაცება. ინციდენტის შედეგად არავინ დაზარალებულა", - ამის შესახებ "ჯი-ეიჩ-ენს" ბანკიდან აცნობეს.
პროკრედიტ ბანკი აცხადებს, რომ კლიენტებს არ აქვთ აღელვების საფუძველი - მათ თანხას საფრთხე არ ემუქრება. ბანკში მოქმედებს ძლიერი დაცვის და რისკების მართვის სისტემა. ინციდენტი მთლიანად არის დაფიქსირებული კამერებზე. გატაცებული თანხის მოცულობა მინიმალურია, ვინაიდან მძარცველმა წვდომა შეძლო მხოლოდ ცალკეული ოპერაციისთვისთვის განკუთვნილ თანხაზე. გამოძიების ინტერესებიდან გამომდინარე ბანკი თავს იკავებს დამატებითი დეტალების გამჟღავნებისგან.
პროკრედიტ ბანკი მუშაობას ჩვეულ რეჟიმში განაგრძობს, ხოლო დიღმის სერვისპუნქტი კლიენტებს ხვალიდან მოემსახურება.
