თიბისი ბანკმა და ევროპის რეკონსტრუქციისა და განვითარების ბანკმა (EBRD) დაასრულეს მუშაობა 10 მილიონი აშშ. დოლარის ოდენობის სასესხო ხელშეკრულებაზე კავკასიის ენერგო-ეფექტურობის პროგრამის (CEEP) ფარგლებში. ამ 5-წლიანი რესურსის საშუალებით ბანკი დააფინანსებს კორპორატიული, მცირე და საშუალო ბიზნეს კლიენტების ენერგო-ეფექტურობისა და განახლებადი ენერგიის პროექტებს.
იბიარდის კავკასიის ენერგო-ეფექტურობის პროგრამა შეიქმნა ჩვენ რეგიონში ფინანსური ინსტიტუტების დასაფინანსებლად, რადგან მათ შემდეგ შეძლონ სესხების გაცემა კერძო სექტორის ენერგო-ეფექტურობის და ენერგიის რაციონალურად გამოყენების მიზნით დაგეგმილ ინვესტიციებზე. 2007 წელს თიბისი ბანკმა 10 მილიონი აშშ. დოლარის ოდენობის იგივე ტიპის რესურსი პირველმა მიიღო ქართულ ბანკებს შორის და ეს უკვე მეორე ასეთი ტრანზაქციაა ჩვენი ბანკისთვის.
