მთავრობის ინფორმაციით, 2013 წლის სახელმწიფო ბიუჯეტის პროექტის შემუშავებისას მხედველობაში იქნა მიღებული საქართველოს ეკონომიკური განვითარების მიმდინარე წლის განვლილი პერიოდი და მომავალი წლისათვის არსებული პროგნოზები. განვლილი რვა თვის მონაცემებით მთლიანი შიდა პროდუქტის რეალურმა ზრდამ 7,5% ხოლო მშპ-ს დეფლატორმა 0,3% შეადგინა, რისი გათვალისწინებითაც წლიური მშპ-ს ზრდის პროგნოზი 7,0%-ს, ხოლო დეფლატორის პროგნოზი 2,0%-ს შეადგენს. მსოფლიო ეკონომიკაში არსებული ტენდენციების გათვალისწინებით, საერთაშორისო სავალუტო ფონდთან შეთანხმებით, მომავალი წლის ფისკალური და მაკროეკონომიკური მაჩვენებლები კვლავ კონსერვატიულად არის დაგეგმილი და 2013 წლისთვის მშპ-ს რეალური ზრდის პროგნოზი 6,0%-ს ხოლო მშპ-ს დეფლატორის 4,5%-ს შეადგენს.

განახლებული მაკროეკონომიკური პარამეტრებიდან გამომდინარე 2012 წლის ნომინალური მშპ-ს პროგნოზი 26 443,7 მლნ ლარს შეადგენს. 2013 წელს, ნომინალურ გამოხატულებაში საქართველოს ეკონომიკა 2 848,0 ლარით გაიზრდება და მთლიანი შიდა პროდუქტის მაჩვენებელი 29 291,7 ლარი იქნება.
მთავრობის ერთ-ერთი ძირითადი პრიორიტეტის მაკროეკონომიკური სტაბილურობის უზრუნველყოფის მიზნით კვლავ გაგრძელდება საბიუჯეტო დეფიციტის და სახელმწიფო ვალის შემცირების ტენდენცია. წამროდგენილი პროექტის მიხედვით მთლიანი შიდა პროდუქტის მიმართ საბიუჯეტო დეფიციტი 3.5%-დან 2,8%-მდე, ხოლო სახელმწიფო ვალის მოცულობა 36,5%-დან 32.8%-მდე მცირდება.

"ნაერთი ბიუჯეტის საფინანსო რესურსი ძირითადად კვლავ საგადასახადო და სხვა მიმდინარე შემოსავლებისგან შედგება და მათი წილი საფინანსო რესურსის მთლიან მოცულობაში 85,0%-ს აღემატება.
საგადასახადო შემოსავლების გაანგარიშებისას გათვალისწინებულ იქნა მაკროეკონომიკური პროგნოზები და მოქმედი საგადასახადო კანონმდებლობა, რომლის მიხედვითაც საშემოსავლო გადასახადის განაკვეთი 20%-დან 18%-მდე მცირდება (დივიდენდებზე 5,0%-დან 3,0%-მდე). ნაერთი ბიუჯეტის საგადასახადო შემოსავლების საპროგნოზო მაჩვენებელი განისაზღვრა 7 064,0 მლნ ლარით, რაც მთლიანი შიდა პროდუქტის 24.1%-ს შეადგენს, ხოლო მიმდინარე წლის გეგმიურ მაჩვენებელზე 442.0 მლნ ლარით მეტია"- ნათქვამია 2013 წლის ბიუჯეტის პროექტის განმარტებით ბარათში.

2014 წლისათვის თავისუფლების აქტით განსაზღვრული მაჩვენებლების მიღწევისათვის მთავრობა კვლავ აგრძელებს მშპ-ს მიმართ სახელმწიფო ხარჯების შემცირების პოლიტიკას. წარმოდგენილი პროექტის მიხედვით ნაერთი ბიუჯეტის გადასახდელები მშპ-ს მიმართ 2012 წელს არსებული 32,9%-იდან მცირდება 31,0%-მდე. ნაერთი ბიუჯეტის ხარჯები შეადგენს მშპ-ს 23,2%-ს, არაფინანსური აქტივების ზრდა 5,6%-ს, ფინანსური აქტივების ზრდა 0,4%-ს, ხოლო ვალდებულებების კლება 1,8%-ს.
ნომინალურ გამოხატულებაში ნაერთი ბიუჯეტის გადასახდელების მთლიანი მოცულობა 9 089,0 მლნ ლარს შეადგენს, რაც მიმდინარე წლის მაჩვენებელზე 383,0 მლნ ლარით მეტია.