ცენტრალური საარჩევნო კომისია მზად არის არჩევნები მშვიდობიანად და კანონის სრული დაცვით ჩაატაროს. ამის შესახებ ცესკოს თავმჯდომარემ, ზურაბ ხარატიშვილმა შემაჯამებელ ბრიფინგზე განაცხადა.
მისი თქმით, 1-ელ ოქტომბერს, ამომრჩევლებს ადმინისტრაციასთან კომუნიკაციის საშუალება მთელი დღის განმავლობაში ექნება.
"ამოქმედებულია "ცხელი ხაზი", ასევე, შესაძლებელია ადმინისტრაციასთან დაკავშირება ონლაინ-ოპერატორების საშუალებითაც", - განაცხადა ხარატიშვილმა.
მისივე განცხადებით, არჩევნების დღეს იმუშავებს საარჩევნო ადმინისტრაციის 47.424 და პოლიტიკური სუბიექტების 33.300-მდე წევრი.
არჩევნებს დააკვირდება 62.115 ადგილობრივი და 1646 საერთაშორისო დამკვირვებელი.
ბრიფინგის ბოლოს ხარატიშვილმა კიდევ ერთხელ განმარტა ის შეზღუდვები და აკრძალვები, რაც არჩევნების დღეს იმოქმედებს და კიდევ ერთხელ მოუწოდა ამომრჩევლებს, ნუ მივლენ არჩევნებზე რომელიმე პოლიტიკური სუბიექტის სიმბოლიკიანი მაისურით ან სხვა ატრიბუტებით, რადგან ამან შეიძლება მათი დაჯარიმება გამოიწვიოს.
