თეორიული ფიზიკის დარგში ქართველმა მეცნიერმა, ნიუ-იორკის უნივერსიტეტის პროფესორმა გიორგი დვალმა, Media.Ge-ს გამოსაქვეყნებლად გამოუგზავნა თავისი წერილი, სადაც მეცნიერი საქართველოს ანტი-დემოკრატიულ სახელმწიფოს უწოდებს და სიტყვის თავისუფლების პრობლემაზეც ამახვილებს ყურადღებას.
Media.Ge უცვლელად ავრცელებს ფიზიკოსის საპროტესო წერილს:
"სამწუხაროდ, დღეს საქართველო ანტი-დემოკრატიული ქვეყანაა, ამ მდგომარეობისთვის დამახასიათებელი ყველა თვისებით. უკიდურესად შეზღუდულია სიტყვის თავისუფლება, არ არსებობს დამოუკიდებელი სასამართლო და ასე შემდეგ.
თითოეული სიმახინჯე და პრობლემა სწორედ ამ მდგომარეობიდან გამომდინარეობს. მმართველი რეჟიმის ერთ-ერთი დამახასიათებელი თვისება ამ პრობლემების საპირისპიროდ წარმოჩენა და ილუზიის შექმნაა, რომ ხელისუფლებას დემოკრატია სურს.
ამის კარგი მაგალითია სასაცილო საუბრები თანამედროვე დასავლური ტიპის საუნივერსიტეტო სისტემის შექმნაზე, რაც პრინციპულად შეუძლებელია არადემოკრატიულ პირობებში. თუნდაც იმ მარტივი მიზეზის გამო, რომ ნებისმიერი არადემოკრატული მმართველობა სისტემატიზირებულ ტყუილზე და ძალადობაზეა დაფუძნებული, რაც თავისუფალ აზროვნებასთან პრინციპულად შეუთავსებელია.
ამ მოკლე წერილის მიზანია არსებული მდგომარეობის მიმართ პროტესტის გამოთქმა. ჩვენ კატეგორიულად მოვითხოვთ დემოკრატიას ქვეყანაში.
"ჩვენ"-ში იგულისხმება ნებისმიერი ადამიანი, ვინც ამ წერილის შინაარსს იზიარებს. ნებისმიერი სამთავრობო გუნდი ან პოლიტიკური ძალა, რომელიც დემოკრატიის გზას არ აირჩევს, აუცილებლად მიიყვანს ქვეყანას კატასტროფამდე.
გია დვალი, ნიუ იორკი 29. 09. 2012"
