27-28 სექტემბერს „დემოკრატიული მოძრაობის" თავმჯდომარემ ნინო ბურჯანაძემ შეხვედრები გამართა შვეიცარიის, საფრანგეთისა და ესტონეთის საგანგებო და სრულუფლებიან ელჩებთან საქართველოში.
შეხვედრებზე საუბარი შეეხო ქვეყანაში შექმნილ უმძიმეს წინასაარჩევნო გარემოს, პოლიტიკურ ვითარებას და საქართველოს ციხეებში პატიმრების წამებისა და არასათანადო მოპყრობის დამადასტურებელ ვიდეოკადრებს, რომლებიც ქართული მედიასაშუალებებით უკვე რამდენიმე დღეა ვრცელდება.
საუბრისას საგანგებო ყურედღება დაეთმო ხელისუფლების მხრიდან მოსალოდნელ საფრთხეებს როგორც არჩევნებამდე, ასევე არჩევნების შემდგომ პერიოდში.
ბურჯანაძემ ელჩებს გააცნო „დემოკრატიული მოძრაობის" ხედვა არსებულ ვითარებასთან დაკავშირებით და ხაზი გაუსვა საერთაშორისო თანამეგობრობის ადექვატური და ობიექტური როლის მნიშვნელობასა და აუცილებლობას.
შეხვედრები გრძელდება, გასული ოთხი დღის განმავლობაში კი ქალბატონმა ნინო ბურჯანაძემ შეხვედრები ასევე გამართა ევროკავშირის, ჩეხეთის, გერმანიის, ლიტვის, იტალიისა და საბერძნეთის საგანგებო და სრულუფლებიან ელჩებთან.
