წმინდა 100 000 მოწამის წამების ადგილზე, მეტეხის ხიდზე, პარაკლისი დასრულდა. პარაკლისი სრულიად საქართველოს კათალიკოს-პატრიარქმა, უწმინდესმა და უნეტარესმა ილია მეორემ სასულიერო პირებთან ერთად აღავლინა.
მსახურებას დიდძალი მრევლი ესწრებოდა, რომლებიც დღეს თბილისის კურთხევასთან დაკავშირებით მსვლელობებში მონაწილეობდნენ.
პარაკლისის დაწყებამდე პატრიარქმა მრევლს ქადაგებით მიმართა. უწმინდესმა მრევლს ჯვართამაღლების დღე მიულოცა და აღნიშნა, რომ ღვთისმშობელი ყოველთვის იცავდა და დღესაც იცავს საქართველოს. მან კურთხევა მისცა მრევლს, რომ ღვთისმშობლის ლოცვა - "მოწყალებისა კარი განგვიღე კურთხეულო ღვთისმშობელო" - რამდენჯერმე ეთქვათ პარაკლისის დაწყებამდე და პარაკლისის ბოლოსაც. პარაკლისის დასრულების შემდეგ უწმიდესმა მრევლი კიდევ ერთხელ დალოცა და შეკრებილებს სამების ტაძარში წასვლისკენ მოუწოდა, სადაც აფხაზეთის ომში დაღუპულთათვის პანაშვიდს იხდის.
