საქართველოს პრეზიდენტი, მიხეილ სააკაშვილი, აჭარის მთავრობის თავმჯდომარესთან, ლევან ვარშალომიძესთან ერთად ბათუმში, თამარის დასახლებაში მოქმედ "ადიდასის" ცნობილი ბრენდის სპორტული ტანსაცმლის დამზადების პროცესს დაესწრო და დასაქმებულთა მუშაობის პირობებით დაინტერესდა.
სააკაშვილმა რეგიონში მცირე და მსხვილი საწარმოების მნიშვნელობაზე ისაუბრა და აღნიშნა, რომ საჭიროა მსგავსი ობიექტების გაზრდა ისე, რომ დასაქმების საშუალება აჭარის მაღალმთიან სოფლებში მცხოვრებ მოსახლოებასაც მიეცეს.
თამარის დასახლებაში მდებარე სამკერვალოში "ადიდასისა" და "პუმას" ბრენდის სამოსი ერთი წელია იკერება და მსოფლიოს სხვადასხვა ქვეყანაში გადის ექსპორტზე. საწარმოში ამ ეტაპზე 450 ადამიანი მუშაობს. როგორც "აჭარა ტექსტილის" დამფუძნებელი, ჯემალ ბილგინგულუოღლუ აცხადებს, სამომავლოდ თანამშრომელთა რაოდენობა მნიშვნელოვნად გაიზრდება.
საწარმო "აჭარა ტექსტილი" საქართველოში 2009 წელს გაიხსნა. პირველი სამკერვალო ქობულეთში, სოფელ ბობოყვათში ამოქმედდა. საწარმოში ამჟამად "პუმას","ლოტოსა" და "ერინის" ფირმის როგორც სპორტულ, ასევე ყოველდღიურ ტანისამოსს კერავენ. დაარსებიდან დღემდე ამ სფეროში თურქული ინვესტიციის მოცულობამ 6 მლნ. დოლარს მიაღწია.
