"მას, ვინც ამ დღეებში ქვეყანას კვებავს კომპრომატებით, თავისი ხალხი ეზიზღება, მიაჩნია, რომ ხალხით მანიპულირება ადვილია - მთავარია დაშოკო, ცხვირწინ რაღაც დაუკიდო, რაღაცას პატარას დაჰპირდე, წაეძველბიჭო, დაჩაგრო და მერე ხალხი თავისით წამოგყვება", _ განაცხადა საქართველოს პრეზიდენტმა მიხეილ სააკაშვილმა ქუთაისში მოსახლეობასთან შეხვედრისას.
მისი თქმით, ხვალ არის დიდი შეკრება თბილისის სტადიონზე, მაგრამ ვიდრე ეს შეხვედრა გაიმართება, საქართველოს პრეზიდენტი ყველას შეახსენებს, რომ საქართველოში დღეიდან არის ორი დედაქალაქი - და "ამიტომ დღევანდელი შეხვედრა იმართება აქ".
"ხომ ეგონათ, რომ ყველაფერი გაჩარხეს? ხომ იკითხა მათმა ბატონ-პატრონმა, როდის არის საქართველოში არჩევნებიო? ხომ მისცა 2 მილიარდი? ხომ დაუმზადა კომპრომატები? ხომ გაუკეთა ყველაფერი, მაგრამ ყველაფერი ამის შემდეგ 1-ელ ოქტობერს ერთი სუბიექტი გამორჩათ ამ მთელი პროცესის - ჩვენ გამოვრჩით! ქართველი ერი გამორჩათ მხედველობიდან! ამიტომ, როგორც არასდროს, მე ვარ ამაყი ჩვენი ხალხით", - აცხადებს სააკაშვილი. და აღნიშნავს, რომ მთავარი, რაც ქართველმა ხალხმა არ უნდა დაკარგოს, არის ის, რომ ქალაქში, სადაც ბავშვები იზრდებიან ნორმალურ ატმოსფეროში, არ დაბრუნდნენ კანონიერი ქურდები.
"ქუთაისში ვეღარასდროს დაბრუნდებიან კანონიერი ქურდები", _ განაცხადა სააკაშვილმა.
