„ქრისტიან-დემოკრატიული მოძრაობის" ლიდერების გიორგი თარგამაძის და გიორგი ახვლედიანის ფოთში მოსახლეობასთან შეხვედრის მათავარი თემა პატიმართა წამების ფაქტები და მათი უფლებების უხეში დარღვევა იყო.
გიორგი თარგამაძის განცხადებით, გლდანის მერვე საპყრობილეში განვითარებულ მოვლენები არ არის პირველი შემთხვევა პატიმრების უფლებების უხეში დარღვევის კუთხით, რასაც ასევე ნათლად ასახავდა სახალხო დამცველის დასკვნაც.
მოძრაობის ლიდერის თქმით, პატიმართა უფლებების დამრღვევი პირები სამაგალითოდ უნდა დაისაჯონ და დაუყოვნებლივ უნდა აღიძრას მათი სისხლის სამართლის პასუხისმგებლობის საკითხი.
"ქრისტიან-დემოკრატები" საქართველოს პარლამენტში ოთხი წლის განმავლობაში განსაკუთრებულ ყურადღებას ამახვილებდენ პატიმართა უფლებების დარღვევის შემზარავ ფაქტებზე და სამჯერ დააყენეს სასჯელაღსრულების მინისტრის იმპიჩმენტის საკითხი.
სასჯელაღსრულების სისტემაში არსებულ დანაშაულებრივ ქმედებებზე საუბრის შემდეგ გიორგი თარგამაძემ და გიორგი ახვლედიანმა მოსახლეობას „ქრისტიან-დემოკრატების" საარჩევნო პროგრამა და პრიორიტეტები გააცნეს და მოუწოდეს პირველ ოქტომბერს სწორი არჩევანის გაკეთებისკენ.
„პირველი ოქტომბერი ყველა „ქრისტიან-დემოკრატების" მხარდამჭერისთვის, აქ შეკრებილი საზოგადოებისთვის, ფოთელებისთვის, იქნება არჩევანი, რომელშიც პროტესტი ძალიან დიდი დოზით იქნება გამოხატული ნაციონალური მოძრაობის წინააღმდეგ, მაგრამ ჩვენი ამოცანაა, რომ ხალხთან ერთად პირველ ოქტომბერს არამხოლოდ წინააღმდეგობის არჩევანი გავაკეთოთ, არამედ ნათლად წარმოვიდგინოთ როგორო საქართველო გვინდა ავაშენოთ, ჩვენი შეთავაზებაა „ქრისტიან-დემოკრატიული" საქართველო" - განაცხადა გიორგი თარგამაძემ.