კახეთში ჰიბრიდული ჯიშის ყურძენს არცერთი ღვინის ქარხანა არ იბარებს. როგორც მევენახეებმა კახეთის საინფორმაციო ცენტრს განუცხადეს, ყურძენი უკვე გადამწიფდა და ლპება.
რთველის საკოორდინაციო შტაბის უფროსის პაატა ჭავჭანიძის განცხადებით, ჰიბრიდული ჯიშის ყურძენი დაახლოებით 60 ჰექტარზეა დარჩენილი და სულ 50 ტონამდე მოსავალია მოსალოდნელი. „ჯერ არცერთი ქარხანა არ იბარებს. ალბათ, კერძო პირები გამოჩნდებიან. ჰიბრიდული ჯიშის ყურძენზე სახელმწიფოს სუბსიდია არ გაიცემა", - განუცხადა პაატა ჭავჭანიძემ კახეთის საინფორმაციო ცენტრს.
გასულ წელს კახეთში ჰიბრიდული ჯიშის ყურძენი სახელმწიფო საწარმომ „რთველი - 2008" 10-15 თეთრად ჩაიბარა. სულ რეგიონში 4 335 ტონა ჰიბრიდული ჯიშის ყურძნის მოსავალი მოვიდა. 18 - 20 თეთრად ჩაიბარეს 1 კგ ჰიბრიდული ჯიშის ყურძენი ახალსოფლის და ყვარლის ღვინის ქარხნებმა. ჰიბრიდული ჯიშის ყურძენზე სუბსიდია არ გაიცემა. გლეხების თქმით, ჰიბრიდული ჯიშის ყურძნის ფასი იმდენად იაფი იყო, რომ ღვინის ქარხნამდე ტრანსპორტირების ხარჯებიც კი ვერ აანაზღაურა.
