ამ ზეიმისათვის გამომცემლობა "საუნჯეს" მიერ გამოცემულია ხვარამზეს ლექსების კრებული "ვერცხლის თასადამც მაქცია", რაც ბიბლიოგრაფიულ იშვიათობას წარმოადგენდა და ხვარამზეობის დღესასწაულის ფარგლებში გამომცემლობის ინიციატივით მოეწყობა კრებულის წარდგინება საზოგადოებისათვის.

ღონისძიებაში მონაწილეობენ ქართველი პოეტები, ცნობილი სახალხო მთქმელები, ფოლკლორული კოლექტივები და ინდივიდუალური შემსრულებლები.

გამოიფინება ნატურპროდუქტი და ხელმარჯვე ოსტატთა ნაწარმი, გაიყიდება წიგნები და ხელნაკეთი ნივთები.

ამ ზეიმის ფარგლებში წელს უკვე მეორედ ჩატარდება ერთი ლექსის კონკურსი პოეტ ქალთა შორის ერთ-ერთი პირველი ქართველი პოეტი ქალის, ხვარამზეს ("ვერცხლის თასადამც მაქცია") პრემიის მოსაპოვებლად. კონკურსში მონაწილეობდა 61 პოეტი ქალბატონი.

I, II და III ადგილებისათვის დაწესებულია ფულადი პრემიები, ერთი პრემია "გრან-პრი" და ასევე სხვადასახვა სახელობითი პრიზები და სიურპრიზები.

საკონკურსო ნაწარმოებებიდან შერჩეულია 15 ყველაზე მაღალრეიტინგული ლექსი. მათი ავტორები მიწვეული არიან თიანეთის მუნიციპალიტეტის სოფ. არტანში "ხვარამზეობაში" მონაწილეობის მისაღებად.

მოეწყობა სწრაფი კვების ობიექტები, სადაც სტუმრებს შესთავაზებენ ტრადიციულ ფშაურ ხინკალს, კეცეულებს, მხლოვანებს, დამბალ ხაჭოს და ქადებს.

ეს ღონისძიება რეგიონში კულტურული ტურიზმის განვითარების პროექტის ფარგლებში იმართება და მიზნად ისახავს რეგიონის ტურისტული ინფრასტრუქტურის საზოგადოებისათვის გაცნობას, უაღრესად საინტერესო შემოქმედი ადამიანის ბიოგრაფიის კიდევ უფრო წარმოჩენას მთელი ქვეყნის მასშტაბით და ამ კუთხის, როგორც ნიჭიერი შემოქმედი ქალის სამშობლოს პოპულარიზაციას.

ძალიან კარგი სასაუბრო თემაა თავად ხვარამზე - ქალი სიყვარულის ცოცხალი ტაძარი, ქალი, რომელიც ყველა ტაბუს არღვევდა მე-19 საუკუნის დასაწყისში, როცა ევროპელებს ეს არც დაესიზმრებოდათ, ქალი თავისუფლების ნათელი მაგალითი... და თანაც ძალიან კარგი პოეტი... ქალი, რომელიც თავისი ლექსებით საუკუნენახევრის მერეც ძალიან აქტუალურია.... სასურველია, რომ ჩვენი კონკურსის დასკვნითი ეტაპის მონაწილე 15 ქალბატონთან ერთად, დღევანდელ საქართველოში მოღვაწე პოეტი ქალბატონებიდან ნებისმიერი ისევე შემორჩეს ისტორიას თავისი შემოქმედებით, როგორც ეს უსწავლელი ფშაველი ქალი ცოცხლობს დღემდე.

ღონისძიების ორგანიზატორები არიან არასამეწარმეო კავშირი "ჩვენი ფშავი" და გამომცემლობა "საუნჯე".