საარჩევნო ბლოკ "ბიძინა ივანიშვილი - ქართული ოცნების" ლიდერი ბიძინა ივანიშვილი ქართველ ფეხბურთელებსა და კალათბურთელებს წარმატებას უსურვებს, _ აღნიშნულის შესახებ ინფორმაცია "ქართული ოცნების" ფეისბუკის გვერდზე ვრცელდება.
"საქართველოს მოსახლეობა, განსაკუთრებით კი ფეხბურთის გულშემატკივრები, დღეს მოუთმენლად ელიან 2014 წლის ფეხბურთის მსოფლიო ჩემპიონატის შესარჩევ მატჩს საქართველოს ნაკრებსა და ესპანეთის ნაკრებს შორის. მინდა, წარმატება ვუსურვო საქართველოს ნაკრებს. მჯერა, რომ ქართველი ფეხბურთელები ძალისხმევას არ დაიშურებენ გამარჯვებისთვის და ჩვენი მრავალრიცხოვანი გულშემატკივრის გახარებისთვის. "ევრობასკეტ 2013"-ის შესარჩევ ტურში იბრძვიან დღეს ქართველი კალათბურთელებიც. ეროვნული ნაკრები ჰოლანდიის გუნდს განმეორებით მატჩში მასპინძლობს. წარმატება ვუსურვოთ ქართველ კალათბურთელებს. მათ ასევე მინდა მივულოცო 8 სექტემბერს, ლატვიის გუნდთან მნიშვნელოვანი გამარჯვება, რამაც ქართველ კალათბურთელებს მეორე ადგილი და ევროპის ჩემპიონატის საგზური მოოპოვა. დარწმუნებული ვარ, ჩვენი სპორტსმენები კიდევ ბევრჯერ გაახარებენ გულშემატკივრებსა და ჩვენს ქვეყანას", _ აცხადებს ივანიშვილი.
11 სექტემბერს საქართველოს კალათბურთელთა ნაკრები თბილისის სპორტის სასახლეში 2013 წლის ევრობასკეტის საკვალიფიკაციო ტურნირს დაასრულებს. იგი ჰოლანდიის ეროვნულ ნაკრებს დაუპირისპირდება. შეხვედრა 17:30 საათზე დაიწყება. საქართველოს საფეხბურთო ნაკრები კი ესპანეთის ნაკრებს დაუპირისპირდება. მატჩი "დინამო არენაზე" 21:30 საათზე დაიწყება.
