ჩვენი ბავშვების მომავალს აღარ გადავაბარებთ ყარყარაშვილებს, ხაინდრავებს, შევარდნაძეებს, ვაჟა ლორთქიფანიძეებს და ათასი ჯურის ქურდბაცაცებს, ბანდიტებს და სამშობლოს გამყიდველებს", - ამის შესახებ საქართველოს პრეზიდენტმა მიხეილ სააკაშვილმა ზუგდიდის მთავარ მოედანზე, ნაციონალური მოძრაობის ყრილობაზე სიტყვით გამოსვლისას განაცხადა.
პრეზიდენტმა გაიხსენა 2003 წელი, როდესაც ზუგდიდიდან "ვარდების რევოლუცია" დაიწყო. სააკაშვილის თქმით, რევოლუციის პროცესს პოლიტიკოსები სკეპტიკურად უყურებდნენ, თუმცა სამეგრელო ყველაზე ოპტიმისტურად იყო განწყობილი და მიაღწია კიდეც მიზანს.
"ვარდების რევოლუცია ამ მოედნიდან დაიწყო. აქ მაშინ სხვანაირი მოედანი იყო, ჩაბნელებული იყო. მახსოვს იმ დღეს აქ ძალიან წვიმდა, დღევანდელივით მზიანი ამინდი არ იყო, მაგრამ მაშინაც იყო ჩემს გულში სითბო, იმიტომ, რომ ბევრი თქვენგანი იყო აქ, მათბობდით, მამხნევებდით, მეუბნებოდით, რომ შეუძლებელი არაფერია. ყველა პოლიტიკოსი თბილისში ენას რომ აჭარტალებდა, რომ შევარდნაძე ცხრათავიანი გველეშაპია, მაგის დამმარცხებელი ძალა არ არისო, ჩვენ ზუგდიდიდან ვთქვით, ჩავალთ და რამდენიმე დღეში აღარ იქნება, ჩავედით და რამდენიმე დღეში აღარ იყო. ეს შეუძლია სამეგრელოს და ეს შეუძლია ზუგდიდს", _ განაცხადა მიხეილ სააკაშვილმა.
