ევროპა რუსული ხორბლის გაძვირების მოლოდინშია. რუსეთი, 2010 წლის მსგავსად, აიმედებს მსოფლიოს საზოგადოებას, რომ მარცვლეულზე ფასებს არ გაზრდის. თუმცა დასავლელი ექსპერტები აცხადებენ, რომ ეს არის რუსეთისგან გარკვეული მანევრი და მოსკოვი ამჟამად დროს იგებს, რათა მისმა ტრეიდერებმა სარფიანი გადაწყვეტილებები მიიღონ.
"ეს არის კლასიკა. ისინი ჭიმავენ დროს და ტრეიდერებს აძლევენ გარკვეულ პერიოდს ბიზნესის გასაკეთებლად. შემდგომ კი დააწესებენ გადასახადებს, ან რაღაც ამდაგვარს,"- აცხადებს Horizon Soft Commodities-ის ანალიტიკოსი პიერ დუპეროუსი.
ანალოგიური მოსაზრება აქვთ სხვა ევროპელ ექსპერტებსა და ტრეიდერებს. ისინი მიიჩნევენ, რომ რუსეთი აუცილებლად მოახდენს მარცვლეულის ფასის ზრდას და შესაბამისი კვოტების დაწესებას, ეს იმის მიუხედავად, რომ რუსეთის ფედერაციის ვიცე-პრემიერი ალექსეი დვორკოვიჩი უარყოფს მარცვლეულის ბაზარზე რაიმე სახის დამატებითი ღონისძიებების გატარებას.
ანგარიშგასაწევია ის გარემოებაც, რომ ყაზახეთის მარცვლეულის სახელმწიფო ოპერატორმა უკვე დაიწყო ფასების ზრდა.
ასევე ფასები მთლიანობაში იზრდება მარცვლეულზე და ბოლო ვაჭრობების მიხედვით, მარცვლეულის სხვადასხვა სახეობებზე ფასების მინიმალური შემცირება, რეალურად არ ასახავს ბაზარზე არსებულ დინამიკას.
