19-წლიანი მოლაპარაკებების შემდეგ, ჟენევის დროით ზუსტად 00:00 საათზე ძალაში შევიდა ოქმი, რუსეთის ფედერაციის მარაკეშის შეთანხმებასთან მიერთების შესახებ, რომელიც საფუძვლად უდევს მსოფლიო სავაჭრო ორგანიზაციის დაფუძნებას. რუსეთი ორგანიზაციის 156-ე წევრი გახდა.
ქართველი ექსპერტები აცხადებენ, რომ მსოფლიო სავაჭრო ორგანიზაციაში გაწევრიანების შემდეგ, რუსეთს არამხოლოდ საერთაშორისო ვაჭრობით გათვალისწინებული ნორმების დაცვა, არამედ ადამიანის უფლებებისა და ემიგრაციის უფლებების საერთაშორისო ნორმების დაცვაც მოუწევს.
სწორედ ამ უფლებების დარღვევის გამო, რუსეთის წინააღმდეგ დღემდე მოქმედებს ჯეკსონ ვენიკის ხელშეკრულება, რომლის თანახმად, ადამიანის უფლებების დამრღვევი ქვეყნებისთვის გარკვეული სავაჭრო შეზღუდვები არსებობს.