ეუთოს საპარლამენტო ასამბლეის დელეგაცია წინასაარჩევნოდ "საზოგადოებრივი მაუწყებლის" გეგმებით დაინტერესდა, - ამის შესახებ ჟურნალისტებს, დელეგაციის წევრებთან შეხვედრის შემდეგ , "საზოგადოებრივი მაუწყებლის" სამეურვეო საბჭოს თავმჯდომარე ლევან გახელაძემ განუცხადა.
"საპარლამენტო ასამბლეის დელეგაციას გავაცანით ჩვენი გეგმები, აღვნიშნეთ, რომ ჩვენ ვიმოქმედებთ საკანონმდებლო ჩარჩოში, ასევე ვისაუბრეთ იმ პროექტებზე, რის განხორციელებასაც ვაპირებთ "პირველ არხზე" და "მეორე არხზე". წინასაარჩევნო პროექტების განხორციელება ჩვენ უკვე დავიწყეთ "პირველ არხზე" და ყოველ დღე 8-საათიან მთავარ გამოშვებაში პოლიტიკურ სუბიექტებს საკუთარი აზრის გამოთქმის საშუალებას ვაძლევთ. გარდა ამისა, ვგეგმავთ წინასაარჩევნო დებატებსაც", - აღნიშნა ლევან გახელაძემ.
მისივე განმარტებით, სტუმრების მხრიდან რამდენიმე ტექნიკური ხასიათის შეკითხვაც დაისვა, კერძოდ, "საზოგადოებრივი მაუწყებლის" დაფინანსების წესთან დაკავშირებით.
გახელაძე მიიჩნევს, რომ ეუთოს საპარლამენტო ასამბლეის დელეგაცია "საზოგადოებრივი მაუწყებლის" ხელმძღვანელობისგან მიწოდებული ინფორმაციით კმაყოფილი დარჩა.
შეხვედრაზე ლევან გახელაძესთან ერთად "საზოგადოებრივი მაუწყებლის" გენერალური დირექტორი გია ჭანტურიაც იმყოფებოდა.
